ជ័យជម្នះរបស់ Real Madrid លើ Manchester City ក្នុងវគ្គពាក់កណ្តាលផ្តាច់ព្រ័ត្រ Champions League បានធ្វើឱ្យពិភពលោកភ្ញាក់ផ្អើល ក៏ដូចជាការបង្ហាញទម្រង់លេងរបស់ Rodrygo Goes ផងដែរ។
កីឡាករប្រេស៊ីលរូបនេះ បានចេញពីកៅអីបម្រុង ដើម្បីស៊ុតបាល់បញ្ចូលទីយ៉ាងល្អ ហើយវីរៈបុរសបាល់ទាត់ប្រេស៊ីលលោក Pele បានបង្ហោះនៅលើបណ្តាញ Instagram ដើម្បីអបអរសាទរដល់តារាឆ្នើមវ័យក្មេង ជាជនរួមជាតិរបស់គាត់។
Pele បានសរសេថា «ខ្ញុំរង់ចាំថ្ងៃនេះ ដើម្បីអបអរអ្នក។ អ្នកចាប់ផ្តើមល្អប្រសើរហើយ អ្នកនឹងនាំមកឲ្យយើងនូវសេចក្តីអំណរជាច្រើន Rodrygo។ អបអរសាទរ Real Madrid! ខ្ញុំពិតជាអន្ទះសារ ចង់មើលវគ្គផ្តាច់ព្រ័ត្រ!»។
Pele គឺជាអ្នកគាំទ្រដ៏ធំរបស់ Rodrygo ចាប់តាំងពីថ្ងៃរបស់គាត់នៅ Santos ជាក្លឹបដែល Pele ខ្លួនឯងបានចំណាយពេលភាគច្រើននៃអាជីពរបស់គាត់។
Rodrygo បានឆ្លើយតបសារដោយអរគុណ Pele សម្រាប់ពាក្យល្អៗរបស់គាត់។ តារាឆ្នើមវ័យក្មេងរូបនេះបាននិយាយថា៖ «សូមអរគុណចំពោះពាក្យសម្ដីរបស់អ្នក។ ខ្ញុំនឹងមិនភ្លេចពាក្យដំបូន្មានរបស់អ្នកទេ ហើយខ្ញុំដឹងគុណអ្នកជារៀងរហូត»៕
