អ្នកចាត់ការទូទៅក្រុមហង្សក្រហមលោក Jurgen Klopp ជឿជាក់ថា ការបង្ហាញខ្លួនលើកដំបូងរបស់ខ្សែប្រយុទ្ធ Luis Diaz ជាការលេងដ៏ល្អបំផុតដែលលោកមិនធ្លាប់ឃើញពីមុនមក។
Diaz បានទទួលឱកាសបង្ហាញសមត្ថភាពលើកដំបូងនៅ Premier League ក្នុងជំនួបទល់នឹង Leicester City ដោយគេបានសាងភាពលេចធ្លោគួរឱ្យចាប់អារម្មណ៍ ក្នុងការជួយក្រុមរបស់ខ្លួនទទួលបានជ័យជម្នះ ២-០ ក្នុងការប្រកួតនោះ។
ខ្សែប្រយុទ្ធកូឡុំប៊ីរូបនេះ បានចូលរួមក្រុមហង្សក្រហមពី Porto កាលពីខែមុនក្នុងតម្លៃ ៤៩លានផោន ប៉ុន្ដែគេបានសម្របខ្លួនបានយ៉ាងឆាប់រហ័ស នៅក្នុងក្រុមរបស់លោក Klopp។
នៅពេលត្រូវបានសួរពីការសម្របខ្លួនដ៏ឆាប់រហ័សពី Diaz ក្រោយពីការផ្លាស់មកចូលរួមទឹកដី Anfield លោក Klopp បាននិយាយក្នុងសន្និសីទសារព័ត៌មាន កាលពីថ្ងៃសុក្រថា៖ «ដោយសារជំនាញ និងបុគ្គលិកលក្ខណៈរបស់គេ។ វាពិតជាការបង្ហាញខ្លួនលើកដំបូងដ៏ល្អបំផុត ដែលខ្ញុំមិនធ្លាប់ឃើញពីមុនមក ពីកីឡាករថ្មីម្នាក់»។
«វាជាការពិត ព្រោះគេសម្របបានយ៉ាងពេញលេញ ប៉ុន្ដែវាគ្រាន់តែជាការប្រកួតដំបូងប៉ុណ្ណោះ ហើយយើងត្រូវតែចាំមើល ពីការសម្របរបស់គេទៅនឹងរាល់ស្ថានភាពទាំងអស់ ហើយនឹងកម្រិតប្រកួតប្រជែងនៅ Premier League»។
«មិនមានការប្រញាប់ប្រញាល់នោះទេ ប៉ុន្ដែកាលពីថ្ងៃមុន ជាឱកាសដ៏ល្អក្នុងការដាក់គេលេងក្នុងជម្រើសដំបូង ព្រោះ Sadio Mane មិនអាចមកចូលរួមបាននៅឡើយ ហើយ Mo Salah ទើបតែត្រលប់ពីការប្រកួតដ៏អស្ចារ្យមួយ»៕
