បាត់ដំបង៖ នៅថ្ងៃទី១១ ខែកុម្ភៈ ឆ្នាំ២០២២ តាមផ្លូវជាតិលេខ៥៧ ស្ថិតក្នុងភូមិបឹងរាំង ឃុំបឹងរាំង ស្រុកកំរៀង ខេត្តបាត់ដំបង កម្លាំងការិយាល័យនគរបាលប្រឆាំងបទល្មើសសេដ្ឋកិច្ចដែលមានលោកវរសេនីយ៍ឯក យី យក់សាន ជានាយការិយាល័យ ដឹកនាំកម្លាំងចូលរួមជាមួយកម្លាំងនគរបាល នៃអធិការដ្ឋាននគរបាលស្រុកកំរៀង ឃាត់រថយន្តមួយគ្រឿងម៉ាក់កាមារី Camary កាត់ទ្រុង ពណ៌ទឹកប្រាក់ ពាក់ស្លាកលេខ សៀមរាប 2A-0832 ដែលសមត្ថកិច្ចមានតម្រុយថាកំពុងដឹកទំនិញខូចគុណភាព។
ពេលសមត្ថកិច្ចកំពុងត្រួតពិនិត្យនេះ ម្ចាស់រថយន្តខាងលើបានរត់គេចខ្លួនបាត់ពីទីនោះតែម្តង ហើយពេលសមត្ថកិច្ចពិនិត្យក្នុងរថយន្តឃើញមាន៖ ប្រហិតចម្រុះចំនួន ៨០០គីឡូក្រាម និងសាច់ជ្រូកចង្កាក់ចំនួន ២០០គីឡូក្រាម ដែលទំនិញខាងលើនេះលួចលាក់នាំចូលពីប្រទេសថៃ ហើយមិនមានការវេចខ្ចប់ និង រក្សាទុកស្របតាមលក្ខណៈ បច្ចេកទេសត្រឹមត្រូវនោះទេ។
បច្ចុប្បន្នទំនិញខាងលើសមត្ថកិច្ចនគរបាល សហការជាមួយផ្នែកជំនាញពេទ្យសត្វដុតបំផ្លាញចោលនៅមូលដ្ឋាននោះហើយ រីឯរថយន្តបានយកមករក្សាទុកនៅកន្លែងសមត្ថកិច្ចដើម្បីស្រាវជ្រាវបន្ត៕
ប្រភព៖ អគ្គស្នងការដ្ឋាននគរបាលជាតិ
