កីឡាករ Kurt Zouma បានបាត់បង់កិច្ចព្រមព្រៀងឧបត្ថម្ភរបស់គាត់ជាមួយក្រុមហ៊ុន Adidas បន្ទាប់ពីត្រូវបានលេចធ្លាយវីដេអូ វាយ ទាត់ ទះឆ្មា ដែលជាសត្វចិញ្ចឹមរបស់គាត់។
កីឡាករវ័យ ២៧ ឆ្នាំរូបនេះ ត្រូវបានពិន័យជាប្រាក់ ២៥០,០០០ ផោនដោយក្លឹប West Ham ខណៈដែលឆ្មាពីរក្បាលរបស់គាត់ត្រូវបានរឹបអូសដោយ RSPCA បន្ទាប់ពីវីដេអូ ដែលត្រូវបានបង្ហោះដំបូងនៅលើ Snapchat ដោយបងប្រុសរបស់គាត់ឈ្មោះ Yoan ។
អ្នកចាត់ការទូទៅក្រុម West Ham លោក David Moyes បានសម្រេចចិត្តដាក់ Zouma ឲ្យចូលលេងក្នុងជ័យជម្នះ ១-០ លើក្រុម Watford កាលពីល្ងាចថ្ងៃអង្គារ បើទោះបីជាខ្សែការពារសញ្ជាតិបារាំងរូបនេះ ត្រូវបានអ្នកគាំទ្រទាំងសងខាងជាច្រើន ស្រែកដៀលជេ អំឡុងពេលប្រកួតក៏ដោយ។
ប៉ុន្តែឥឡូវនេះ Adidas បានបញ្ជាក់ថា កិច្ចព្រមព្រៀងផ្ទាល់ខ្លួនជាមួយ Zouma ដែលបានចាប់ផ្តើមកាលពីឆ្នាំមុន នឹងត្រូវបញ្ចប់ជាការឆ្លើយតបទៅនឹងវីដេអូបែកធ្លាយ។
យោងតាមសេចក្តីថ្លែងការណ៍របស់ Adidas បានសរសេរថា “យើងបានបញ្ចប់ការស៊ើបអង្កេតរបស់យើង ហើយអាចបញ្ជាក់ថា Kurt Zouma មិនមែនជាអត្តពលិកជាប់កិច្ចសន្យារបស់ adidas ទៀតទេ” ៕
