ចក្រភពអង់គ្លេស និងអៀរឡង់ បានប្រកាសផែនការសម្រាប់ការដេញថ្លៃ ដើម្បីធ្វើជាម្ចាស់ផ្ទះរួមគ្នា ការប្រកួតជើងឯកទ្វីបអឺរ៉ុបឆ្នាំ ២០២៨ ។ នេះបើយោងតាមសមាគមកីឡាបាល់ទាត់នៃប្រទេសអង់គ្លេស អៀរឡង់ខាងជើង ស្កុតឡែន វេល និងសាធារណរដ្ឋអៀរឡង់ បាននិយាយនៅក្នុងសេចក្តីថ្លែងការណ៍រួមមួយកាលពីថ្ងៃចន្ទ ។
សមាគមទាំង ៥ បានទម្លាក់ផែនការដេញថ្លៃ សម្រាប់ការធ្វើជាម្ចាស់ផ្ទះការប្រកួតបាល់ទាត់ពិភពលោកឆ្នាំ ២០៣០ ហើយនឹងផ្តោតការប្រកួតជើងឯកទ្វីបអឺរ៉ុបវិញ ។
ពួកគេបាននិយាយនៅក្នុងសេចក្តីថ្លែងការណ៍មួយថា “ ការធ្វើជាម្ចាស់ផ្ទះ UEFA Euro ផ្តល់នូវការវិលត្រឡប់ស្រដៀងគ្នា លើការវិនិយោគជាមួយនឹងព្រឹត្តិការណ៍តំបន់អឺរ៉ុប ចំណាយតិចជាង ហើយទទួលបានផលប្រយោជន៍លឿនជាង ” ។
“ យើងជឿថាចក្រភពអង់គ្លេស និងសាធារណៈរដ្ឋអៀរឡង់ អាចផ្តល់ជូន UEFA និងសមាគមន៍បាល់ទាត់អឺរ៉ុប នូវអ្វីដែលពិសេសនៅ ឆ្នាំ ២០២៨ ដែលជាកិច្ចសហការគ្នាជាលក្ខណៈ ៥ ប្រទេសនេះដែលប្លែកពីគេ នេះនឹងផ្តល់នូវបទពិសោធន៍ដ៏អស្ចារ្យសម្រាប់ក្រុម និងអ្នកគាំទ្រ ” ។
សូមជម្រាបថាការប្រកួត UEFA Euro 2020 ត្រូវបានធ្វើឡើងនៅទីក្រុង ម្ចាស់ផ្ទះ ជាច្រើននៅទូទាំងទ្វីបអឺរ៉ុប ។ ចំណែកការប្រកួតជើងឯកទ្វីបអឺរ៉ុបឆ្នាំ ២០២៤ នឹងត្រូវធ្វើជាម្ចាស់ផ្ទះដោយប្រទេសអាល្លឺម៉ង់៕
