ទីបំផុត PSG អាចនឹងមានឱកាសចុះហត្ថលេខាលើកំពូលខ្សែប្រយុទ្ធ Cristiano Ronaldo របស់ក្រុមបិសាចក្រហម Manchester United ហើយ នេះបើយោងតាមការរាយការណ៍ពីគេហទំព័រ Mirror ។
កីឡាករសញ្ជាតិព័រទុយហ្គាល់វ័យ ៣៧ឆ្នាំរូបនេះ ត្រូវបានគេរាយការណ៍ថា មានការខកចិត្តយ៉ាងខ្លាំងនៅ Old Trafford បន្ទាប់ពីធ្លាក់ចេញពីពាន FA Cup ទាំងគួរឲ្យភ្ញាក់ផ្អើល ក្រោមថ្វីជើងក្រុម Middlesbrough ។
គួររំលឹកឡើងវិញដែរថា Ronaldo បានចូលរួមជាមួយក្រុម Old Trafford កាលពីរដូវក្តៅមុន ដែលធ្វើអោយពិភពបាល់ទាត់មានភាពភ្ញាក់ផ្អើល។ ការត្រលប់មកកាន់ Man Utd វិញ បានធ្វើឲ្យអ្នកជំនាញ និងអ្នកគាំទ្ររំពឹងថាក្រុមបិសាចក្រហមនឹងក្លាយបេក្ខភាពប្រជែងដណ្តើមពាន Premier League ដ៏លេចធ្លោនៅរដូវកាលនេះ ប៉ុន្តែអ្វីៗផ្ទុយពីការរំពឹងទុក។
បើយោងទៅតាមកាសែត Mirror បានលើកឡើងថា Ronaldo អាចនឹងចាកចេញពី Man Utd ក្រោយបញ្ចប់រដូវកាលនេះ ដើម្បីផ្លាស់ទៅកាន់ PSG ដែលចង់បានរូបគេមករួមក្រុមខ្លាំង ក្នុងគោលដៅបង្កើនប្រាក់ចំណូល និង ប្រជាប្រិយភាពរបស់ពួកគេ៕
