ជាការពិតណាស់ ក្លឹបស្ករគ្រាប់ Everton បានរកឃើញអ្នកចាត់ការថ្មីជាផ្លូវការ បន្ទាប់ពីការដកតំណែងលោក Rafael Benitez កាលពីពេលកន្លងទៅ នោះគឺអតីតតារាឆ្នើមរបស់តោខៀវលោក Frank Lampard ហើយបានចុះហត្ថលេខាលើកុងត្រាថ្មី ដល់ចុងខែ មិថុនា ឆ្នាំ ២០២៤។
យ៉ាងណាមិញ Lampard ក៏បានដាក់សំណើទៅថ្នាក់លើក្លឹបរួចជាស្រេចហើយដែរ ជុំវិញការចង់បានជំនួយការថ្មី ដោយចង់ឲ្យក្លឹបទៅចរចាយក Ashley Cole ដែលធ្លាប់ជាមិត្តចាស់រួមអាជីព កាលនៅក្លឹបចាស់។ ខណៈដែលសព្វថ្ងៃ Cole គេកំពុងមានការងារជាគ្រូនៃឈុតថ្នាលរបស់ក្លឹប Chelsea និងជាគ្រូក្រុមជម្រើសជាតិអង់គ្លេសឈុត U21 ផងដែរ។
ដូច្នេះមិនច្បាស់ថា Cole គេនឹងយល់ព្រមតាមសំណើខាងលើ ហើយមករួមដៃកែប្រែក្លឹបម្ចាស់ដី Goodison Park ជាមួយ Lampard ឬបែបណានោះទេ តែដឹងថាការសម្រេចចិត្ត នឹងអាចទទួលបានចម្លើយយ៉ាងយូរ ៣-៤ ថ្ងៃទៀត។
គួរបញ្ជាក់ថា បច្ចុប្បន្នក្រុមការងាររបស់ Lampard ដែលមានស្រាប់តួយ៉ាងគឺ Joe Edwards ជាជំនួយការផ្ទាល់តាំងពីនៅ Chelsea និងអតីតគ្រូក្លឹប Derby លោក Paul Clement និង Chris Jones រីឯលោក Alan Kelley ជាគ្រូអ្នកចាំទី។
ជាមួយវត្តមាននៃការមកដល់របស់គ្រូវ័យ ៤៣ ឆ្នាំខាងលើ Everton ក៏ទើបតែផ្តល់កាដូធំផងដែរ ពោលគឺការផ្ទេរចូលកីឡាករចំណូលថ្មី ២ រូបមានខ្សែបម្រើ Dele Alli ពីក្លឹប Spurs និងខ្ចីជើងបាន Donny van de Beek ពីក្លឹប Man Utd។ ការប្រកួតដំបូងរបស់ Lampard នឹងត្រូវប៉ះក្លឹប Brentford នៅ FA Cup នាថ្ងៃទី ៥ កុម្ភៈ៕
