កូរ៉េខាងត្បូងបានកក់កន្លែងក្នុងព្រឹត្តិការណ៍ World Cup នៅប្រទេសកាតាកាលពីថ្ងៃអង្គារទី 1 ខែកុម្ភៈ បន្ទាប់ពីបានផ្តួលក្រុមស៊ីរី 2-0 ក្នុងទីក្រុងឌូបៃ ដើម្បីបញ្ជាក់ពីការរីកចម្រើនរបស់ពួកគេទៅកាន់វគ្គផ្តាច់ព្រ័ត្រជាលើកទី 10 ជាប់ៗគ្នា។
ពិតណាស់ បន្ទាប់ពីអ៊ីរ៉ង់យកឈ្នះទៅលើអ៊ីរ៉ាក់ ដោយលទ្ធផល 1-0 ក្នុងការប្រកួតជម្រុះក្នុងពូល A ប្រចាំទ្វីបអាស៊ី ក៏នាំឲ្យអ៊ីរ៉ង់ក្លាយជាក្រុមដំបូងគេនៅអាស៊ី ដែលយកបានកៅអីឡើងទៅលេងនៅ World Cup 2022។ ឥឡូវថ្មីៗនេះ យើងរកឃើញក្រុមមួយទៀតហើយនៅអាស៊ី នោះគឺកូរ៉េខាងត្បូង។
គួរជម្រាបថា ក្រុមដែលមានកៅអីនៅចំណោមកៅអីទាំង32 វគ្គចែកពូល World Cup 2022 នៅកាតា សរុបរកបាន 15 ក្រុមហើយរួមមាន កាតា [ម្ចាស់ ផ្ទះ] អាល្លឺម៉ង់ ដាណឺម៉ាក ប្រេស៊ីល បារាំង បែលហ្សិក ក្រូអាត អេស្ប៉ាញ ស៊ែប៊ី អង់គ្លេស ស្វីស ហូឡង់ អាហ្សង់ទីន អ៊ីរ៉ង់ និងកូរ៉េខាងត្បូង។
គួរបញ្ជាក់ថា កាលបរិច្ឆេទប្រកួតផ្លូវការ World Cup 2022 នឹងធ្វើឡើងនៅចន្លោះថ្ងៃទី 21 វិច្ឆិកា ដល់ 18 ធ្នូ ដែលមានកីឡដ្ឋានចំនួន ៨ ក្នុងទីក្រុងទាំង 5 នៅកាតារៀបចំធ្វើជាទីកន្លែងប្រកួត៕
