យោងតាមប្រភពពីសារព័ត៌មានអេស្ប៉ាញ AS បានឲ្យដឹងថា Cristiano Ronaldo នឹងមិនបន្ដលេងនៅ Manchester United នោះទេ ប្រសិនបើពួកគេមិនអាចទទួលបានកៅអីចូលរួមប្រកួត UEFA Champions League នៅរដូវកាលក្រោយ។
ខ្សែប្រយុទ្ធព័រទុយហ្កាល់រូបនេះ នៅមានមហិច្ឆតាចង់ឈ្នះពានធំបំផុតសម្រាប់ក្លិបអឺរ៉ុបលើកទី៦ ដើម្បីអាចតាមស្មើអតីតកីឡាករ Paco Gento ដែលទើបចែកឋានថ្មីៗនេះ។
ក្រោយចែកផ្លូវគ្នាពី Juventus Ronaldo បានត្រឡប់មកចូលរួមក្លិបបិសាចក្រហមជាថ្មីម្តងទៀត កាលពីរដូវក្ដៅកន្លងទៅ ប៉ុន្ដែអ្វីៗមិនអាចកើតឡើងតាមការរំពឹងនោះទេ។
ក្រុមដែលបច្ចុប្បន្នដឹកនាំដោយ អ្នកចាត់ការស្ដីទីលោក Ralf Rangnick មានគម្លាត៥ពិន្ទុពីក្រុមលេខ៤ និង៧ពិន្ទុពីក្រុមកំពូលតារាង។
ទោះជាយ៉ាងណា Ronaldo ជាកីឡាករមានគ្រាប់បាល់ច្រើនបំផុតនៅ Champions League ដោយរកបានសរុប ១៤០គ្រាប់ ហើយគេក៏ជាកីឡាករបាល់ទាត់ ដែលរកគ្រាប់បាល់ជូនក្រុមជម្រើសជាតិច្រើនបំផុត ១១៥គ្រាប់ និងទទួលបានពាន Special Award ពី FIFA ផងដែរ៕
