លោក Ralf Rangnick បានពន្យល់ប្រាប់ពីមូលហេតុដែលលោកប្តូរ Christiano Ronaldo ចេញក្នុងការប្រកួតទល់នឹង Brentford ថាវាគឺជាយុទ្ធសាស្ត្រ។
គួររំលឹកថា Brentford បានបើកទ្វារទទួលក្រុមភ្ញៀវ Manchester United ក្នុងការប្រកួតក្របខណ្ឌ Premier League ដោយលទ្ធផល ចាញ់ក្រុមបិសាចក្រហម ៣-១។
ពិតណាស់ កីឡាកររបស់បិសាចក្រហមដូចជា Anthony Elanga ,Mason Greenwood និង Marcus Rashford លេងសហការគ្នាបានយ៉ាងល្អ ដែលរកបានម្នាក់ ១គ្រាប់ជួយឲ្យ Man United ទទួលបាន៣ពិន្ទុ ខណៈដែលរៀមច្បង CR7 បានបញ្ចេញការខឹងសម្បាបន្ទាប់ពីត្រូវបានគ្រូបង្វឹកប្តូរចេញ នៅនាទីទី៧១ ជំនួសដោយ ប្រធានក្រុម Harry Maguire។
ទោះជាយ៉ាងណា ក្រោយបញ្ចប់ការប្រកួតលោក Rangnick បានពន្យល់ថា៖ “គាត់បានសួរខ្ញុំថា ហេតុអ្វីក៏ជាខ្ញុំ? ហេតុអ្វីបានប្តូរគេចេញ! ពេលនោះខ្ញុំបានឆ្លើយថា ស្តាប់ខ្ញុំណា “ដូ” ខ្ញុំធ្វើការសម្រេចចិត្តនេះ គឺដើម្បីផលប្រយោជន៍ក្រុមទាំងមូល។ ពួកយើងធ្លាប់ជួបស្ថានការណ៍បែបនេះម្ដងរួចមកហើយ កាលពី ៥ ថ្ងៃមុននៅ Villa Park ដែលត្រូវបានគេវាយបកវិញ ២គ្រាប់។ ពិតណាស់ខ្ញុំមិនចង់ឲ្យកើតមានកំហុសច្រំដែលនោះទេ។ ដោយខ្ញុំសំរេចដាក់ Harry Maguire ចូលដើម្បីឲ្យមានខ្សែការពារ៥នាក់ និងនាំខ្សែប្រយុទ្ធស្លាប Rashford ចូលដោយគេមានល្បឿនលឿន។ ខ្ញុំគិតថាវាជាការសម្រេចចិត្តដ៏ត្រឹមត្រូវ។ ខ្ញុំគ្មានបញ្ហាអ្វីជាមួយ Ronaldo ទេ គេទើបតែវិលត្រឡប់ពីរបួស ហើយគេមិនបានចូលហ្វឹកហាត់ ជាងមួយសប្តាហ៍កន្លះមកហើយ។ ម្យ៉ាងវិញទៀត ពួកយើងបានពិភាក្សាគ្នារួចហើយ មុនការប្រកួត FA Cup នៅមុនការប្រកួតលីក ដោយគាត់ប្រាប់ខ្ញុំថាគាត់មានបញ្ហាត្រគាក ហើយពួកយើងក៏បានព្រមព្រៀងគ្នាហើយ ដោយមិនចង់ឱ្យមានបញ្ហាណាមួយកើតឡើងបន្ថែមលើរបួសនោះទេ។ តួយ៉ាង ថ្ងៃនេះគាត់ជាសះស្បើយ ដូច្នេះខ្ញុំបានដាក់ឲ្យចូលលេងតាំងពីដើមតង់ ដោយគ្មានបញ្ហា។ ហើយពេលខាងមុខ គ្រប់គ្នាច្បាស់ជាដឹងថា ជ័យជម្នះរបស់ក្រុមគឺជារឿងសំខាន់បំផុត “៕
