វីរបុរសបាល់ទាត់អង់គ្លេសលោក Rio Ferdinand បាននិយាយថា កាយវិការរបស់ខ្សែប្រយុទ្ធ Marcus Rashford ហាក់បីដូចជាបញ្ជាក់ហើយថាគេមិនសូវសប្បាយចិត្ត និងកំពុងមានការព្រួយបារម្ភថា ខ្លួនឯងអាចមិនសូវមាននាទីចូលលេងច្រើនជាងមុន ក្រោមការដឹកនាំរបស់លោក Ralf Rangnick ។
កាលពីយប់ថ្ងៃទី៣ ខែមករាកន្លងទៅនេះគឺ Manchester United បានចាញ់ Wolves ១ ទល់នឹង០ ក្នុងដីខ្លួនឯងដែលធ្វើឲ្យផ្ទុះការរិះគន់ជាហូរហែ បើទោះបីជានេះជាបរាជ័យលើកដំបូងក្រោមការដឹកនាំរបស់លោក Rangnick ក៏ដោយ។
ខណៈនោះដែរ គេមើលឃើញថា Marcus Rashford ហាក់បីដូចជាជួបបញ្ហាបន្ទាប់ពីត្រូវគ្រូប្ដូរចូលនៅតង់ទី២។ កីឡាកររូបនេះលេងបាល់ ដូចគ្មានព្រលឹងក្នុងខ្លួន។
លោក Rio Ferdinand បានថ្លែងប្រាប់ FIVE ថា៖ «ភាសាកាយវិការគឺជាបញ្ហាមួយ។ Marcus Rashford បានប្ដូរចូលហើយអ្នករំពឹងទុកថាគេនឹងលេងបានល្អ។ ពេលខ្លះខ្ញុំមើលឃើញថាគេធ្វើឲ្យគេរបូតបាល់ពីជើង ហើយកាយវិការគេពេលនោះគឺខ្ញុំមិនចង់ឃើញទេ។ ប្រហែលជាមកពីគេមិនសប្បាយចិត្តដែលមិនបានលេង ប៉ុន្តែអ្នកត្រូវតែទុករឿងនោះមួយឡែក។ ប្រហែលជាគេមានអារម្មណ៍ថាមិនសូវទទួលបានឱកាសដែលគេសមគួរនឹងបាន៕
