ក្លឹប AS Roma ដែលដឹកនាំដោយអ្នកចាត់ការលោក Jose Mourinho ត្រូវបានគេរាយការណ៍ថា កៀកនឹងសម្រេចការផ្ទេរក្នុងលក្ខខណ្ឌខ្ចីជើង សម្រាប់កីឡាករវ័យ ២៤ ឆ្នាំរបស់ ក្លឹប Arsenal ពោលគឺទំនងជាសម្រេចទៅបានយ៉ាងយូរចន្លោះ ៤៨ ម៉ោងខាងមុខ។
Ainsley Maitland-Niles ដែលលេងតំណែងបម្រើស្លាប ហើយក្រោមការដឹកនាំរបស់លោក Mikel Arteta គេមិនសូវទទួលបានឱកាសឈរជើងនោះទេ ពោលចំនួននាទីឈរជើងរដូវកាលនេះ មិនបានដល់ ៥០០ នាទីផង។ ដូច្នេះជាជាងបន្តខាតពេលនៅការអង្គុយកៅអីបម្រុង សម្រាប់កីឡាករវ័យ ២៤ ឆ្នាំរូបនេះ ក៏ស្រវាទៅរកការលេងជាប់លាប់ជាមួយក្លឹបក្រៅលីគនោះគឺ Roma តែត្រឹមលក្ខខណ្ឌខ្ចីជើងសិនប៉ុណ្ណោះ។
យោងតាមសារព័ត៌មាន ESPN បានឲ្យដឹងថាកិច្ចព្រមព្រៀងខាងលើ នឹងប្រកាសចន្លោះពី ២៤ ទៅ ៤៨ ម៉ោងបន្ទាប់ ហើយខាងភាគីក្លឹបអ៊ីតាលី នឹងពុំមានសិទ្ធទិញផ្តាច់នៅរដូវក្តៅនោះទេពោល Arsenal មានបំណងតែចង់ឲ្យគេទៅទទួលបានពេលវេលាលេងនៅ Roma តែប៉ុណ្ណោះ។
យ៉ាងណាមិញ Maitland-Niles សេសសល់សុពលភាពកុងត្រាជាមួយ Arsenal ដល់ចុងខែមិថុនាឆ្នាំ ២០២៣ ជាមួយនឹងតម្លៃផ្ទេរល្បាក់ ១០ ទៅ ២០ លានផោន។ គេជាអតីតយុវជនថ្នាលនៅក្លឹប រួចបានឡើងមកឈុតធំ កាលពីរដូវក្តៅឆ្នាំ ២០១៧៕
