វីរបុរសបាល់ទាត់សញ្ជាតិស្កុតឡេនលោក Frank McVennie បាននិយាយថាក្លិបបិសាចក្រហម Manchester United មិនគួរដាក់ខ្សែបម្រើ Paul Pogba ឲ្យចូលលេងទៀតនោះឡើយ ទាល់តែកីឡាករសញ្ជាតិបារាំងរូបនេះព្រមព្រៀងបន្តកុងត្រាថ្មី។
ជាក់ស្តែង កុងត្រាបច្ចុប្បន្នរបស់ Pogba នឹងអស់សុពុលភាពនៅខែមិថុនា ឆ្នាំ២០២២ ខាងមុខ ហើយមកទល់នឹងពេលនេះ Pogba ហាក់មិនបានបង្ហាញបំណងចង់បន្តស្នាក់នៅ Manchester United ឡើយ។ ខណៈដែលក្លិបធំៗដូចជា Real Madrid, Juventus, Paris Saint-Germain សុទ្ធតែចង់បានរូបគេផងដែរ។
ខ្សែបម្រើសញ្ជាតិបារាំងរូបនេះ ទើបនឹងចូលលេងក្នុងការប្រកួតទល់នឹង Atlanta ខណៈដែលគេរកបាន ៣៨គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបាន ៤៧គ្រាប់ក្នុងការបង្ហាញខ្លួន ២១៦ប្រកួតឲ្យក្លិប។
យ៉ាងណាមិញលោក McVennie គិតថា Pogba គួរតែក្លាយជាអ្នកដឹកនាំក្រុមបិសាចក្រហម ព្រោះគេបានទទួលប្រាក់ឈ្នួលខ្ពស់ណាស់ លោកបានលើកឡើងថា៖ «ក្មេងនោះមានសមត្ថភាព ប៉ុន្តែគេលេងមិនសូវអស់ពីចិត្ត។ សម្រាប់ខ្ញុំ គេជាឧទាហរណ៍ដែលអាចសង្ខេបគ្រប់យ៉ាងដែលកើតឡើងនៅ Man Utd នាប៉ុន្មានរដូវកាលចុងក្រោយមកនេះ។ អ្នកទាំងអស់គ្នាទៅស្ដីបន្ទោសអ្នកចាត់ការ ជំនួសឲ្យកីឡាករទៅវិញ។ ផ្អែកលើប្រាក់ដ៏ច្រើនដែលពួកគេចំណាយទៅលើ Pogba គួរតែជាអ្នកដឹកនាំលេងដ៏ពិតប្រាកដនៅក្នុងទីលាន។ ប៉ុន្តែគេមិនមានសមត្ថភាពអាចធ្វើបែបនោះទេ។ បើសិនគេមិនចង់លេងឲ្យក្លិបនេះទៀតគឺ កុំដាក់ឲ្យគេលេងអី។ ខ្ញុំប្រាកដចិត្តថា Man United នឹងមិនអីទេ បើទោះបីគ្មានគេក៏ដោយ។ បើសិនគេមិនចុះកុងត្រាថ្មី គេមិនគួរលេងឲ្យ Man United ទៀតទេ»៕
