តារាឆ្នើមរបស់ Liverpool កីឡាករ Mohamed Salah បានបើកចំហរអំពីទំនាក់ទំនងរបស់គាត់ជាមួយមិត្តរួមក្រុម Sadio Mane ។ ខ្សែប្រយុទ្ធស្លាបវ័យ ២៩ ឆ្នាំរូបនេះបានសារភាពថា ពេលខ្លះគាត់បានប្រព្រឹត្តក្នុងលក្ខណៈអាត្មានិយមដែលវាជាអចេតនា។
Salah បាននិយាយថាគាត់ និង Mane មានទំនាក់ទំនងស្អិតរមួត។ ទោះបីជាមានការប្រជែងគ្នាក្នុងអាជីពក៏ដោយ ក៏ពួកគេទាំងពីរតែងតែខិតខំបម្រើ Liverpool ជាមុនសិន។ ថ្លែងទៅកាន់ទូរទស្សន៍អេហ្ស៊ីប MBC Salah បាននិយាយថា៖
«ទំនាក់ទំនងរបស់ខ្ញុំជាមួយ Sadio Mane គឺយើងជាមិត្តរួមក្រុមនៅលើទីលាន និងនៅក្នុងបន្ទប់ផ្លាស់សម្លៀកបំពាក់ ហើយវាជាទំនាក់ទំនងប្រកបដោយវិជ្ជាជីវៈ។ គាត់និងខ្ញុំផ្តល់អ្វីគ្រប់យ៉ាងដែលយើងមានដើម្បីឲ្យក្រុមឈ្នះ។ យើងប្រហែលជាមានការប្រកួតប្រជែងថាអ្នកណាល្អជាង ប៉ុន្តែនេះជារឿងធម្មតានៅក្នុងក្រុម និងជាសិទ្ធិស្របច្បាប់សម្រាប់កីឡាករណាមួយក៏ដោយ ប៉ុន្តែនៅទីបញ្ចប់ យើងធ្វើការដើម្បីបម្រើក្រុម»។
Mohamed Salah ក៏បានបញ្ជាក់ផងដែរថា គាត់មិនច្រណែនទេ ប្រសិនបើមិត្តរួមក្រុម Liverpool ណាម្នាក់ស៊ុតបញ្ចូលទីបានច្រើន។ ខ្សែប្រយុទ្ធស្លាបរូបនេះបានបញ្ជាក់ថា គ្មានទំនាក់ទំនងអាក្រក់ណាមួយរវាងគាត់និង Mane ខណៈអ្នកទាំងពីរផ្តល់បាល់ Assists ឱ្យគ្នាទៅវិញទៅមក។
គាត់បាននិយាយថា៖ «ពេលខ្លះខ្ញុំធ្វើរឿងអាត្មានិយមនៅលើទីលាន ហើយវាមិនមានចេតនាទេ»។ Salah បានបន្តថា៖ «នៅក្នុងការប្រកួតមួយ Sadio បានចាកចេញពីទីលានដោយខឹង។ នេះជាលើកទីមួយហើយដែលមនុស្សគ្រប់គ្នានិយាយអំពីទំនាក់ទំនងមិនល្អរវាងពួកយើង ហើយពួកគេតែងតែតាមចាប់កំហុស នៅពេលដែលខ្ញុំមិនបានបញ្ជូនបាល់ឲ្យគាត់ ឬគាត់មិនបញ្ជូនបាល់ឱ្យខ្ញុំ។ ប៉ុន្តែ Sadio តែងតែធ្វើការ Assists ឲ្យខ្ញុំជាច្រើន ហើយខ្ញុំក៏ដូចគ្នាដែរ។ ខ្ញុំមិនច្រណែនទេ ប្រសិនបើនរណាម្នាក់ស៊ុតបញ្ចូលទីនោះ»៕
សូមទស្សនាវីដេអូខាងក្រោម៖
