ខ្សែប្រយុទ្ធ Cristiano Ronaldo របស់ក្រុមបិសាចក្រហម Manchester United បានក្លាយជាគោលដៅសម្រាប់អ្នករិះគន់ក្នុងរយៈពេលប៉ុន្មានថ្ងៃថ្មីៗនេះ បន្ទាប់ពីការបង្ហាញទម្រង់លេងមិនសូវល្អសម្រាប់ក្រុម។ អតីតតារាឆ្នើមរបស់ក្រុម Real Madrid លោក Luis Figo បានចេញមុខទៅការពារអ្នកឈ្នះ Ballon d’Or ៥សម័យ ចំពេលកំពុងមានសម្ពាធកើនឡើង។
អតីតកីឡាករវ័យ ៤៩ ឆ្នាំរូបនេះបានរំលឹកឡើងវិញថា Cristiano Ronaldo ស្ថិតក្នុងចំណោមកីឡាករកំពូលក្នុងក្រុមនាពេលនេះ ដែលធ្វើអោយគាត់ពិបាកយល់អំពីមូលហេតុដែលត្រូវបានគេរិះគន់។
Figo បាននិយាយអំពីការរិះគន់ដែលផ្តោតលើ Cristiano Ronaldo ។ «CR7 គឺជាកីឡាករម្នាក់ក្នុងចំណោមកីឡាករដែលល្អបំផុតនៅក្នុងក្រុមទាក់ទងនឹងទម្រង់លេង ដូច្នេះខ្ញុំមិនយល់ពីការរិះគន់ទាំងនេះទេ»។
Cristiano Ronaldo បានត្រលប់មកកាន់ Manchester United វិញដោយនឹកស្មានមិនដល់ បន្ទាប់ពីចែកផ្លូវជាមួយ Juventus ក្នុងទីផ្សារដោះដូរកីឡាកររដូវក្តៅ។ ក្រុម Manchester United បានឈ្នះតែពីរប្រកួតប៉ុណ្ណោះក្នុងចំណោមការប្រកួត ៦ ចុងក្រោយរបស់ពួកគេនៅគ្រប់ការប្រកួតទាំងអស់។ បិសាចក្រហមបច្ចុប្បន្នឈរនៅលេខរៀងទី ៨ ក្នុងតារាង Premier League មាន ១៧ ពិន្ទុ ដោយបានកត់ត្រាជ័យជម្នះ ៥ ចាញ់ ៥ និងស្មើ ២លើកមកទល់ពេលនេះ ហើយពួកគេបានធ្លាក់ចេញពីពាន EFL Cup ក្រោយចាញ់ West Ham United ក្នុងលទ្ធផល ១-០ កាលពីខែកញ្ញា៕
សូមទស្សនាវីដេអូខាងក្រោម៖
