ខ្សែប្រយុទ្ធ Cristiano Ronaldo របស់ក្រុម Manchester United ត្រូវបានគេរាយការណ៍ថា ចង់បានអ្នកចាត់ការសញ្ជាតិអេស្ប៉ាញ លោក Luis Enrique ដើម្បីជំនួសកន្លែង Ole Gunnar Solskjaer ជាអ្នកចាត់ការក្រុមបិសាចក្រហម។ ម្ចាស់ជើងឯក Premier League ២០ សម័យបានចែកផ្លូវគ្នាជាមួយអ្នកចាត់ការសញ្ជាតិន័រវេស បន្ទាប់ពីចាញ់ Watford ៤-១ កាលពីថ្ងៃសៅរ៍ក្នុងក្របខ័ណ្ឌ Premier League ។
យោងតាមលោក Rob Dorsett របស់ Sky Sports បានឲ្យដឹងថា ខ្សែប្រយុទ្ធព័រទុយហ្គាល់ Cristiano Ronaldo ជឿជាក់ថាអតីតគ្រូបង្វឹក Barcelona គឺលោក Luis Enrique គឺជាអ្នកជំនួសដ៏ល្អបំផុតសម្រាប់ Ole Gunnar Solskjaer នៅ Manchester United ។ គ្រូបង្វឹកវ័យ ៥១ ឆ្នាំរូបនេះ បានដឹកនាំក្រុមអេស្ប៉ាញទៅកាន់វគ្គពាក់កណ្តាលផ្តាច់ព្រ័ត្រនៃការប្រកួតពានរង្វាន់ Euro ២០២០ និងវគ្គផ្តាច់ព្រ័ត្រនៃ UEFA Nations League ក្នុងឆ្នាំនេះ៕
