យោងតាមការចុះផ្សាយរបស់ Caught Offside បានឲ្យដឹងថាតំណែងរបស់លោក Ole Gunnar Solskjaer កាន់តែរង្គោះរង្គើរខ្លាំង ក្រោយភ្លាត់បរាជ័យក្រោមថ្វីជើងក្រុមមេឃខៀវ។ ប្រភពខាងលើក៏បានបញ្ជាក់ផងដែរថាលោក Brendon Rodgers បានឈានដល់កិច្ចព្រមព្រៀងផ្ទាល់មាត់ជាមួយ Manchester United ដើម្បីជំនួសលោក Solskjaer នៅ Man Utd។
អ្នកចាត់ការសញ្ជាតិន័រវេសបានរងសម្ពាធយ៉ាងខ្លាំងនៅ Old Trafford ក្នុងរយៈពេលថ្មីៗនេះ។ Solskjaer បានដឹកនាំក្រុមបិសាចក្រហមឱ្យឡើងទៅចំណាត់ថ្នាក់លេខ ៣ និងលេខ ២ នៅ Premier League ក្នុងរយៈពេលពីររដូវកាលដំបូងរបស់គាត់ ប៉ុន្តែអ្វីៗបានជួបការលំបាកសម្រាប់រដូវកាលនេះ។
ទោះជាយ៉ាងណា អ្នកចាត់ការន័រវេសរូបនេះធ្លាក់ចូលក្នុងសម្ពាធកាន់តែខ្លាំង ក្រោយដឹកនាំ Manchester United ចាញ់ Liverpool ៥-០ ហើយក៏ចាញ់ Manchester City ២-០ ក្នុងចន្លោះពេលពីរសប្ដាហ៍។
ក្រុមព្រឹក្សាភិបាលរបស់បិសាចក្រហម ត្រូវបានគេរាយការណ៍ថា ការអត់ធ្មត់របស់ពួកគេជាមួយ Solskjaer ជិតនឹងដល់ទីបញ្ចប់ ហើយចង់ឱ្យ Rodgers មកជំនួសតំណែងនេះនៅ Old Trafford ។ អ្នកចាត់ការបច្ចុប្បន្នរបស់ Leicester City ចង់ចូលកាន់តំណែងនៅចុងបញ្ចប់នៃរដូវកាលបច្ចុប្បន្ន។ យ៉ាងណាមិញ Manchester United ចង់ឲ្យគាត់ចូលរួមជាបន្ទាន់៕
