Cristiano Ronaldo បានជួយសម្រាលសម្ពាធលើអ្នកចាត់ការក្រុម Manchester United លោក Ole Gunnar Solskjaer ដែលកៅអីកំពុងឡើងកំដៅ។ កីឡាករសញ្ជាតិព័រទុយហ្គាល់រូបនេះបានស៊ុតបាល់បញ្ចូលទីមួយគ្រាប់ និងបង្កើតឱកាសបានមួយគ្រាប់ទៀត ដើម្បីជម្រុញថ្ងៃដ៏ល្អនៅលើទីលានសម្រាប់បិសាចក្រហម។
នៅក្នុងការប្រកួតនោះ Ronaldo បានបន្ថែមកំណត់ត្រាមួយទៀតនៅក្នុងជ័យជំនះ ៣-០ ក្នុងក្របខ័ណ្ឌ Premier League របស់ Man Utd ទល់ជាមួយនឹង Tottenham Hotspur ។
កីឡាករសញ្ជាតិព័រទុយហ្គាល់បានរកគ្រាប់បាល់បើកឆាកនៃការប្រកួត ហើយបន្ទាប់មកបញ្ជូនបាល់ឲ្យ Edinson Cavani បញ្ចប់ទីបាន១គ្រាប់ទៀត ។ អ្នកឈ្នះពានរង្វាន់ Ballon d’Or ប្រាំសម័យបានក្លាយជាកីឡាករដែលមានវ័យចំណាស់ជាងគេបំផុត ដែលស៊ុតបញ្ចូលទី និងបញ្ជូនបាល់ឲ្យមិត្តរួមក្រុមបញ្ចប់ទីក្នុងការប្រកួត Premier League។
Ronaldo បានចូលរួមជាមួយបិសាចក្រហមម្តងទៀតនៅរដូវក្តៅនេះ។ ខ្សែប្រយុទ្ធឆ្នើមសញ្ជាតិព័រទុយហ្គាល់បានរីករាយនឹងការចាប់ផ្តើមយ៉ាងខ្លាំងក្នុងរដូវកាលនេះ ប៉ុន្តែក្រោយមក អ្វីៗកាន់តែអាក្រក់ទៅៗ នៅពេលដែលក្រុម Manchester United ត្រូវបានក្រុមហង្សក្រហម Liverpool យកឈ្នះក្នុងលទ្ធផល ៥-០ ។
នៅក្នុងជ័យជំនះ ៣-០ លើក្រុមមានខ្នាយមាស Tottenham Hotspur តារាឆ្នើម Cristiano Ronaldo បានក្លាយជាកីឡាករដែលមានវ័យចំណាស់ជាងគេបំផុត ដែលអាចសម្រេចបាននូវភាពជោគជ័យនៅ Premier League ដូចទៅនឹង Didier Drogba ។ អ្វីដែលកាន់តែពិសេសជាងនេះ កីឡាករទាំងពីរបានសម្រេចកំណត់ត្រានៅអាយុ ៣៦ ឆ្នាំ និង ២៦៧ ថ្ងៃ សម្រាប់ការប្រកួតទល់នឹងក្រុមដូចគ្នាគឺ Tottenham Hotspur ៕
សូមទស្សនាវីដេអូខាងក្រោម៖
