បរទេស៖ រឿងក្តីបែកធ្លាយវីដេអូរួមរ័ក្ស ដែលមានពាក់ព័ន្ធជាមួយ Benzema និង Mathieu Valbuena នឹងត្រូវប្រកាសសាលក្រមនៅថ្ងៃសុក្រខាងមុខនេះ។
បើតាមការបញ្ជាក់ពីក្រុមមេធវីបានអោយដឹងថា Benzema មិនបានទៅចូលបង្ហាញខ្លួននៅតុលា កាលពីថ្ងៃពុធកន្លងទៅ ដោយបានប្រាប់ថាមានការងារផ្ទាល់ខ្លួនត្រូវបំពេញ។
គួរបញ្ជាក់ផងដែរថា Benzema រួមជាមួយមនុស្ស ៤នាក់ផ្សេងទៀត ដែលមាន Axel Angot, Mustapha Zouaoui, Younes Houass និង Karim Zenati ត្រូវបានជាប់ពាក់ព័ន្ធជាមួយនឹងការលេចធ្លាយឃ្លីបវីដេអូរួមរ័ក្សមួយ។
ក្នុងនោះដែររឿងរ៉ាងខាងលើនេះកើតតាំងពី ខែមិថុនា ឆ្នាំ២០១៥មកម្ល៉េះ ដោយនៅពេលកំពុងហ្វឹកហាត់សុខៗ ស្រាប់តែ Valbuena បានទទួលទូរស័ព្ទណាត់ជួបពីជនមិនស្គាល់ និងបានគំរាមគាត់អោយបងប្រាក់ជាថ្នូរនឹងការមិនបញ្ចេញវីដេអូរួមរ័ករបស់ខ្សែបម្រើរូបនេះទៅកាន់សាធារណៈ។ គ្រានោះដែរ Benzema ក៏បានជាប់ពាក់ព័ន្ធក្នុងរឿងនេះ ដោយគាត់បានទទូចឲ្យ Valbuena បង់លុយទៅជនមិនស្គាល់មុខនោះ។
លុះក្រោយមក Valbuena មិនព្រម និងបានសម្រេចប្ដឹងទៅប៉ូលិស ហើយក៏ចាប់បានជនមិនស្គាល់មុខ៤នាក់ ដែលសង្ស័យថាបានធ្វើរឿងនេះ ចំណែក Benzema ក៏ត្រូវបានចោទថាបានពាក់ព័ន្ធក្នុងការឃុបឃិតក្នុងរឿងគំរាមទម្លាយវីដេអូរួមរ័កនេះផងដែរ ប៉ុន្តែខ្សែប្រយុទ្ធរូបបានបដិសេធរហូតមក។
ប្រសិនបើជា Benzema ត្រូវរកឃើញថាបានជាប់ពាក់ព័ន្ធនឹងរឿងនេះមែន នោះគេនឹងអាចប្រឈមមុខក្នុងការជាប់គុក ៥ឆ្នាំ និងបង់ពិន័យជាង ៨៧,០០០ដុល្លារ៕
