តារាឆ្នើមរបស់ក្រុម Manchester United កីឡាករ Cristiano Ronaldo បានព្យាយាមប្រមូលផ្តុំមិត្តរួមក្រុមរបស់ខ្លួនមុ នពេលបិសាចក្រហមត្រូវប៉ះជាមួយក្រុម Atalanta ក្នុងការប្រកួតក្របខ័ណ្ឌ Champions League នៅថ្ងៃពុធនេះ។ Ronaldo បានជំរុញឱ្យកីឡាករក្រុមបិសាចក្រហម Manchester United «បង្ហាញពីអ្វីដែលយើងមាន» និង«បង្ហាញភាពអស្ចារ្យដល់ពិភពលោក»។
ក្រុមបិសាចក្រហម Manchester United បានរងនូវការធ្លាក់ចុះទម្រង់លេងយ៉ាងខ្លាំង ដែលធ្វើឱ្យពួកគេឈ្នះតែ ២ លើកគត់ពីការប្រកួត ៧ លើកចុងក្រោយរបស់ពួកគេនៅក្នុងការប្រកួតទាំងអស់សម្រាប់រដូវកាលនេះ។ ដូចនេះ Ronaldo បានព្យាយាមលើកទឹកចិត្តក្រុមឲ្យតស៊ូទៅមុខទៀត។ តារាឆ្នើមព័រទុយហ្កាល់រូបនេះ ជឿជាក់ថាក្របខ័ណ្ឌ Champions League អាចជាវេទិកាមួយសម្រាប់ក្រុមបិសាចក្រហម Manchester United ដើម្បីត្រលប់មករកភាពល្អប្រសើឡើងវិញ។
CR7 បានបង្ហោះនៅលើ Instagram ថា៖ «ពេលវេលារបស់យើងជិតមកដល់ហើយ។ យើងត្រូវតែបង្ហាញពីភាពអស្ចារ្យរបស់យើង ហើយក្របខ័ណ្ឌ Champions League គឺជាការប្រកួតប្រជែងដ៏ល្អឥតខ្ចោះ ដើម្បីបង្ហាញខ្លួនយើងទៅកាន់ពិភពលោក។ តោះ!»។
បញ្ជាក់ផងដែរថា ខ្សែប្រយុទ្ធសញ្ជាតិព័រទុយហ្កាល់រូបនេះ ស៊ុតបញ្ចូលទីបាន ៥ គ្រាប់ក្នុងការបង្ហាញខ្លួន ៥ លើកដំបូងរបស់គេសម្រាប់ក្រុមបិសាចក្រហម Manchester United ចាប់តាំងពីមកដល់ពីក្លិប Juventus នៅរដូវក្តៅនេះ។ ទោះយ៉ាងណា Ronaldo បានតស៊ូក្នុងរយៈពេលប៉ុន្មានសប្តាហ៍ចុងក្រោយនេះ ដោយមិនអាចរកគ្រាប់បាល់បញ្ចូលទីក្នុងការប្រកួតលីក ៣ លើកជាប់ៗគ្នា៕
