ការប្រកួតប្រជែងដណ្តើមពានរង្វាន់ Ballon d’Or សម្រាប់ឆ្នាំ ២០២១ កំពុងតែក្តៅគគុក ដោយកំពូលតារាឆ្នើមរបស់បាល់ទាត់ កំពុងនាំមកនូវភាពលេចធ្លោនៅលើទីលាន។
ខ្សែការពារ Gerard Pique របស់ក្រុម Barcelona បានជ្រើសរើសអតីតមិត្តរួមក្រុមរបស់ខ្លួនគឺ Lionel Messi ជាបេក្ខជនក្នុងចិត្តរបស់គាត់ ដែលអាចនឹងទទួលបានពានរង្វាន់នេះ។
Pique បាននិយាយថា៖ «Ballon d’Or? ប្រសិនបើអ្នកឈ្នះត្រូវបានគេបោះឆ្នោតតាមលក្ខណៈវិនិច្ឆ័យនោះគឺ Messi ។ ប្រសិនបើពួកគេជ្រើសរើសយកកីឡាករល្អបំផុតនៅលើពិភពលោក ក៏នៅតែជា Messi ដែរ»។
Gerard Pique មិនមែនជាមនុស្សតែម្នាក់គត់ដែលជឿជាក់ថា Messi សមនឹងឈ្នះពានរង្វាន់ Ballon d’Or នៅឆ្នាំនេះ។ អ្នកចាត់ការទូទៅក្រុម Barcelona លោក Ronald Koeman ក៏រំពឹងថាកីឡាករអាហ្សង់ទីនរូបនេះ នឹងទទួលបាន Ballon d’Or ក្រោយទទួលបានជោគជ័យក្នុងព្រឹត្តិការណ៍ Copa America ឆ្នាំ ២០២១ ។
ដូចគ្នានេះដែរអ្នកចាត់ការទូទៅរបស់ក្រុម Paris Saint-Germain លោក Mauricio Pochettino ក៏ជឿជាក់ថា តារាឆ្នើមអាហ្សង់ទីន ជាបេក្ខភាពស័ក្តិបំផុតសម្រាប់ពានរង្វាន់ Ballon d’Or នេះដែរ៕
