យោងតាមទូរទស្សន៍ El Chiringuito TV បានអោយដឹងថាក្រុមបិសាចក្រហម Manchester United បានទាក់ទងទៅអតីតអ្នកចាត់ការក្រុម Real Madrid លោក Zinedine Zidane តាមការណែនាំរបស់ Cristiano Ronaldo ក្នុងករណីដែលពួកគេសម្រេចចិត្តបណ្តេញលោក Solskjaer ចេញនាពេលខាងមុខនេះ។
អ្នកចាត់ការបិសាចក្រហមលោក Ole Gunnar Solskjaer បានស្ថិតនៅក្រោមសម្ពាធយ៉ាងខ្លាំង បន្ទាប់ពីមិនស្គាល់ឈ្នះសោះបីប្រកួតនៅ Premier League ។ មានអ្នកចាត់ការជាច្រើនត្រូវបានផ្សារភ្ជាប់ ដើម្បីជំនួសអ្នកចាត់ការសញ្ជាតិន័រវេសដែលមានដូចជាលោក Zidane និង Antonio Conte គឺជាបេក្ខភាពដែលមានអាទិភាពជាងគេ។ ទោះយ៉ាងណាក៏ដោយប្រសិនបើក្រុម Manchester United ចង់ទទួលបានអ្វីដែលល្អបំផុតពីក្រុមបច្ចុប្បន្នរបស់ពួកគេនោះ Zinedine Zidane នឹងក្លាយជាបេក្ខជនដ៏ល្អម្នាក់។
អ្នកចាត់ការសញ្ជាតិបារាំងវ័យ ៤៩ ឆ្នាំរូបនេះ បានគ្រប់គ្រង Raphael Varane និង Cristiano Ronaldo ក្នុងកំឡុងពេលដឹកនាំក្រុម Real Madrid ដែលបានឈ្នះពានរង្វាន់ក្របខ័ណ្ឌ Champions League បីដងជាប់ៗគ្នា ហើយអ្នកចាត់ការរូបនេះក៏ជាមូលហេតុមួយដែលធ្វើឱ្យ Paul Pogba មានពាក្យចចាមអារាមចង់ផ្លាស់ទៅ Bernabeu ផងដែរ។
យោងតាមលោក Gary Neville ការមកដល់របស់កីឡាករ Cristiano Ronaldo មកកាន់ក្រុមបិសាចក្រហម Manchester United បានដាក់សម្ពាធដោយប្រយោលដល់លោក Ole Gunnar Solskjaer ។ នេះដោយសារតែអ្នកចាត់ការទូទៅរូបនេះ ត្រូវបានគេរំពឹងថានឹងឈ្នះពានរង្វាន់ជាមួយក្លិប។ Neville បាននិយាយថា៖ «ដូច្នេះបញ្ហាដែល Ole ទទួលបាននៅពេលនេះគឺ Ronaldo នឹងនាំមកនូវសម្ពាធ។ អ្នកត្រូវតែឈ្នះពានរង្វាន់ជាមួយ Ronaldo។ គាត់មកទីនេះមិនមែនដើម្បីលេងលេខ ២,៣,៤ នោះទេ គឺគាត់មកដើម្បីឈ្នះពានរង្វាន់ធំៗ»៕
