លោកគ្រូតាលោក Sir Alex Ferguson បានបង្ហាញការមិនពេញចិត្ត ជុំវិញការដឹកនាំរបស់លោក Ole Gunnar Solskjaer ចំពោះការប្រកួតទល់នឹងក្លឹប Everton កាលពីល្ងាចថ្ងៃសៅរ៍ ដែលនាំឲ្យ Man Utd លេងបានត្រឹស្មើ ១-១ នៅទឹកដីខ្លួនឯង។
កំឡុងការជជែកជាមួយអតីតតារាឆ្នើម UFC លោក Khabib Nurmagomedov ដែលបានមកទស្សនានៅឯកីឡដ្ឋាន Old Trafford សម្រាប់ Sir Alex បាននិយាយថាប្រកួតបែបហ្នឹង គ្រូគួរតែដាក់ឲ្យ Cristiano Ronaldo លេងជម្រើសដំបូង។
Khabib បានចេញវីដេអូនិយាយថា៖ “កីឡាករវ័យក្មេងទាំងនេះរបស់ Man Utd ពិតជាធ្វើបានល្អ ពួកគេបានបង្ហាញទេពកោសល្យរបស់គេយ៉ាងពិតប្រាកដ”។
យ៉ាងណាមិញលោក Sir Alex បានឆ្លើយមកវិញថា៖ “អាចថាបែបហ្នឹង តែខ្ញុំគិតថាពេលពួកគេឃើញ Ronaldo មិនចូលលេងទេ”។ Khabib តបថាមកវិញទៀតថា៖ “ហ្នឹងហើយ តែ Ronaldo គាត់មកចូលលេងនៅតង់ទីពីរទេតើ”។ ស្រាប់តែ Ferguson ដាក់មួយម៉ាត់ដ៏មានន័យចុងក្រោយថា៖ “ខ្ញុំយល់ Ole គួរតែដាក់កីឡាករល្អបំផុតនៅជម្រើសដំបូងជានិច្ច”។ សំដៅទៅការចង់ឲ្យដាក់ Ronaldo លេងជម្រើស ១១ នាក់នៅថ្ងៃប៉ះ Everton។
បញ្ជាក់ផងដែរថា Cristiano Ronaldo នៅរដូវកាល ២០២១/២២ បានបង្ហាញខ្លួន ៦ ប្រកួត រកបាន ៥គ្រាប់ឲ្យ Man Utd។ ថ្វិបើមានមតិខ្លះបង្ហាញការមិនពេញចិត្ត និងរិះគន់ថា CR7 ជាដើមចមនាំ ឲ្យ United ធ្លាក់ទម្រង់លេង តែសម្រាប់គ្រូតាលោក Sir Alex ហាក់នៅតែឈរខាងកីឡាករព័រទុយហ្គាល់ជានិច្ច៕
