ខ្សែប្រយុទ្ធ Cristiano Ronaldo បានប្រជែងជាមួយគូប្រជែងដ៏យូររបស់ខ្លួនគឺ Lionel Messi ដើម្បីក្លាយជាកីឡាករបាល់ទាត់ ដែលរកចំណូលបានខ្ពស់បំផុតរបស់ទស្សនាវដ្តី Forbes នៅរដូវកាលនេះ បន្ទាប់ពីរូបគេបានវិលត្រឡប់មក Manchester United វិញនៅរដូវក្តៅនេះ។
ផ្អែកលើរបាយការណ៍ប្រាក់ខែ និងចំណូលពាណិជ្ជកម្ម កីឡាករ Cristiano Ronaldo នឹងទទួលបានប្រហែល ១២៥ លានដុល្លារ (៩១.៥ លានផោន) អំឡុងរដូវកាលឆ្នាំ ២០២១-២២ ដែលក្នុងនោះ ៥១.២៥ លានផោននឹងបានមកពីប្រាក់ខែរបស់គាត់ពីក្រុម Manchester United ។
ទន្ទឹមនឹងនេះដែរ Lionel Messi ស្ថិតនៅលំដាប់ទី ២ ដោយរកបាន ១១០ លានដុល្លារ (៨០.៥ លានផោន) ក្នុងរដូវកាលទី ១ របស់គាត់នៅ Paris Saint-Germain ហើយមិត្តរួមក្រុម PSG របស់ Lionel Messi គឺ Neymar និង Kylian Mbappé ធ្លាក់បានចេញពីចំណាត់ថ្នាក់កំពូលទាំង ៤ របស់ទស្សនាវដ្តីមួយនេះ។
Cristiano Ronaldo រកបានជិត ៥៥ លានដុល្លារនៃប្រាក់ចំណូលប្រចាំឆ្នាំរបស់គាត់ ពីកិច្ចព្រមព្រៀងពាណិជ្ជកម្ម និងអ្នកឧបត្ថម្ភ ដែលជាផ្នែកមួយខ្ពស់បំផុតនៅក្នុងពិភពកីឡា។ មានតែកីឡាករចំនួន ៣នាក់ប៉ុណ្ណោះ ដែលនាំមុខម្ចាស់ពានរង្វាន់ Ballon d’Or ៥ សម័យក្នុងរឿងនេះ។ ពួកគេគឺជាកីឡាករវាយកូនបាល់ដ៏ឆ្នើម Roger Federer (៩០ លានដុល្លារ) តារាបាល់បោះ LeBron James (៦៥ លានដុល្លារ) និងកីឡាករវាយកូនហ្គោល Tiger Woods (៦០ លានដុល្លារ) ។
បញ្ជាក់ផងដែរថា Cristiano Ronaldo និង Lionel Messi នាំមុខក្នុងបញ្ជីឈ្មោះកីឡាករបាល់ទាត់ដែលរកចំណូលបានខ្ពស់បំផុតទាំង ១០ របស់ទស្សនាវដ្តី Forbes ក្នុងរដូវកាល ២០២១-២២ បញ្ជីនេះរួមបញ្ចូលទាំងតារាល្បីៗ ផ្សេងទៀតដែលរួមមានដូចជា Neymar, Kylian Mbappé, Mohamed Salah, Robert Lewandowski, Andres Iniesta, Paul Pogba, Gareth Bale និង Eden Hazard ៕
