កីឡាករ Sergio Reguilon ត្រូវបានកោះហៅចូលរួមក្រុមបាល់ទាត់ជម្រើសជាតិអេស្ប៉ាញ សម្រាប់ការប្រកួតទល់នឹងក្រុមកូសូវ៉ូ ក្នុងវគ្គជម្រុះ World Cup ២០២២។
យ៉ាងណាមិញ ក្រុមគោជល់អេស្ប៉ាញ ទទួលបានជ័យជម្នះ ៤-០ យ៉ាងត្រចះត្រចង់ក្រុមលើហ្ស៊កហ្ស៊ី កាលពីថ្ងៃអាទិត្យ បន្ទាប់ពីបរាជ័យក្រោមថ្វីជើង ក្រុមកំពូលតារាងស៊ុយអែត កាលពីសប្ដាហ៍មុន។ ប៉ុន្ដែអំឡុងការប្រកួត ក្រុមរបស់លោក Luis Enrique បានបាត់បង់សមាជិកពីររូបដោយសាររបួសគឺ Aymeric Laporte និង Jose Luis Gaya។ របួសរបស់ Laporte មើលទៅមិនសូវជាធ្ងន់ធ្ងរនោះទេ ខណៈ Gaya ហាក់មានសភាពពិបាកជាង។
ដូច្នេះហើយទើបអេស្ប៉ាញ កោះហៅខ្សែការពារស្លាបឆ្វេង Reguilon មកបន្ថែមម្នាក់ទៀត ដើម្បីជំនួស Gaya ត្រៀមសម្រាប់ការប្រកួតទល់នឹងកូសូវ៉ូ។ កន្លងមក កីឡាករដែលកើតចេញពីថ្នាលរបស់ Real Madrid រូបនេះ មានឱកាសចូលលេងឱ្យក្រុមអេស្ប៉ាញ៥លើក ហើយរំពឹងថាគេនឹងបានលេងប្រកួតទី៦ទល់នឹងកូសូវ៉ូ ប៉ុន្ដែ តារាឆ្នើម Jordi Alba ទំនងមានភាគរយខ្ពស់ជាង ក្នុងការទទួលបានកៅអីពីគ្រូបង្វឹកសម្រាប់តំណែងនេះ៕
