ក្រុមហ៊ុន Nike បាននិយាយថា ខ្លួនបានកាត់ផ្តាច់ទំនាក់ទំនងជាមួយ Neymar កាលពីឆ្នាំមុន ដោយសារតែតារាឆ្នើមប្រេស៊ីលរូបនេះ បានបដិសេធ មិនសហការជាមួយការស៊ើបអង្កេត ចំពោះការចោទប្រកាន់ពីបទ បំពានផ្លូវភេទលើបុគ្គលិកស្រីម្នាក់ របស់ក្រុមហ៊ុន។
ក្រុមហ៊ុនយក្ស ផ្នែកសម្លៀកបំពាក់ធំជាងគេក្នុងពិភពលោក បានបញ្ជាក់នៅក្នុងសេចក្តីថ្លែងការណ៍មួយ ទៅកាន់សារព័ត៌មាន CNN Business កាលពីល្ងាចថ្ងៃព្រហស្បតិ៍ថា ការសម្រេចចិត្តរបស់ខ្លួន គឺផ្តើមចេញពីការចោទប្រកាន់របស់បុគ្គលិកក្រុមហ៊ុន Nike។
ក្រុមហ៊ុន Nike និយាយថាខ្លួនទទួលបានការស៊ើបអង្កេតឯករាជ្យមួយ និងបានរក្សាការប្រឹក្សាផ្នែកច្បាប់ឯករាជ្យដាច់ដោយឡែកសម្រាប់និយោជិក។
មេធាវីការពារក្តីរបស់ Neymar បានថ្លែងថា ការស៊ើបអង្កេតនេះគឺ“ មិនសមហេតុផល” ដោយបន្ថែមថា“ វានឹងមិនសមទេសម្រាប់ក្រុមហ៊ុន Nike ក្នុងការធ្វើសេចក្តីថ្លែងការណ៍ចោទប្រកាន់ដោយមិនមានលទ្ធភាពផ្តល់ការគាំទ្រ” ។
ទោះជាយ៉ាងណាក្តី ក្រុមហ៊ុន Nike បានបន្ថែមថា បានបញ្ចប់ទំនាក់ទំនងរបស់ខ្លួនជាមួយ Neymar ដោយសារតែគាត់បដិសេធ មិនសហការក្នុងការស៊ើបអង្កេតដោយស្មោះត្រង់អំពីការចោទប្រកាន់ ពីការរំលោភបំពានលើនិយោជិក។
ដោយឡែកលោក Dayane Crespo តំណាងរបស់ Neymar បានប្រាប់ CNN Business ថាខ្សែប្រយុទ្ធ Paris Saint-Germain បានបដិសេធការចោទប្រកាន់នេះ ដោយបន្ថែមថាទំនាក់ទំនងរបស់គាត់ជាមួយ Nike ត្រូវបានបញ្ចប់“ ដោយសារហេតុផលពាណិជ្ជកម្ម” តែប៉ុណ្ណោះ។
ជាមួយគ្នានោះ ឪពុករបស់ Neymar គឺ Neymar da Silva Santos ក៏បានបដិសេធផងដែរ នូវការចោទប្រកាន់ចុងក្រោយ ប្រឆាំងនឹងកូនប្រុសរបស់គាត់ នៅក្នុងបទសម្ភាសន៍ជាមួយកាសែតប្រេស៊ីលឈ្មោះ Folha de Sao Paulo ដោយនិយាយថា “យើងមានការភ្ញាក់ផ្អើល” ហើយ “Neymar មិនស្គាល់ក្មេងស្រីនេះទេ” ។
ស្ត្រីរងគ្រោះ ដែលត្រូវបានចោទប្រកាន់មិនត្រូវបានបញ្ចេញឈ្មោះទេ ដោយ Nike បាននិយាយថា “យើងនៅតែបន្តគោរពការសម្ងាត់របស់និយោជិក ហើយក៏ទទួលស្គាល់ផងដែរថានេះជាការលំបាកសម្រាប់នាង” ជានារីរងគ្រោះ៕
