ភ្នំពេញ៖ ចាត់ទុកជាដំណឹងដំបូង ក្នុងវិថីសិល្បៈ ដែលអ្នកចម្រៀង តន់ ច័ន្ទសីម៉ា ព្រមចែកភាគលាភ ជូនអ្នកនិពន្ធយឹម តាស្រង់ ពីកម្មវិធីច្រៀង និងថតស្ពត ខណៈដែល
ឧកញ៉ា ឡេង ណាវ៉ាត្រា ធ្វើជាសាក្សីនៃកិច្ចព្រមព្រៀងនេះ។
នៅល្ងាចថ្ងៃទី២ ខែកុម្ភៈ ឆ្នាំ២០២០ លោក យឹម តាស្រង់ អ្នកនិពន្ធល្បីឈ្មោះ និងជាអ្នកគ្រប់គ្រងក្នុងផលិតកម្មហ្គាឡាក់ស៊ី ណាវ៉ាត្រា បានសរសេរលើបណ្តាញទំនាក់ទំនងសង្គមហ្វេសប៊ុក ថាក្បាលព្រលប់នេះថា «រំភើបបំផុតមួយជីវិតនេះខ្ញុំទើបជួបម្តងទេ ដែលតារាចម្រៀងម្នាក់ហ៊ានចែកផ្តល់ចំណូលមកខ្ញុំជាអ្នកនិពន្ធ 20% ពីការចេញច្រៀងគ្រប់កម្មវិធីប្រគុំតន្ត្រី និងស្ពតពាណិជ្ជកម្មទាំងអស់ក្នុងរយៈពេលដ៏វែងដោយភាពពេញចិត្ត»។
លោកបានបន្តថា« អរគុណណាស់នូវការយល់ពីតម្លៃនៃអ្នកនិពន្ធ ហើយមួយរយៈនេះបងលើកប្អូនស្រីពិតជាមិនខកបំណងមែន? អរគុណនូវទឹកចិត្តដឹងគុណរបស់ប្អូនមកលើបង ប្អូនប្រហែលជាអ្នកចម្រៀងទី១ ហើយបងក៏ប្រហែលជាអ្នកនិពន្ធទី១ផងដែរដែលបានទទួលការចែកភាគលាភបែបនេះពីតារាចម្រៀងកំពុងល្បីម្នាក់បែបនេះ បងនិងខិតខំព្យាយាមបន្តទៀតដើម្បីប្អូន។ ហើយក៏អរគុណផងដែរដល់បងប្អូនក្រុមមេធាវី និងសាក្សី ហើយជាពិសេសនោះអរគុណដល់អគ្គនាយកផលិតកម្ម Galaxy Navatra ឧកញ៉ា ឡេង ណាវ៉ាត្រា ដែលបានចូលរួមជាកិត្តិយសដឹងលឺក្នុងកិច្ចសន្យានេះ។#តន់ចន្ទសីម៉ា»៕
