ដើម្បីលើកទឹកចិត្តដល់ខេមរៈ ស្រីពៅ ក្រុមគ្រួសារទាំងមូលបានព្យាយាមលាក់បាំងព័ត៌មានរយៈពេល ៣ ទៅ ៤ឆ្នាំកន្លងមកនេះ ហើយខាងក្រោមនេះដែរ ក៏ជាហតុផលជាក់លាក់មួយ ដែលគ្រួសាររបស់នាងបានបង្ហាញ ។
លោកខេម ប៊ុនថង បានប្រាប់ថា «ការដែលក្រុមគ្រួសារទាំងមូលព្យាយាមលាក់ពីជំងឺពិតរបស់ប្អូន ខេមរៈ ស្រីពៅ នាពេលកន្លងមក គឺក្នុងបំណងតែម្យ៉ាងគត់ គឺជាការលើកទឹកចិត្តដល់ប្អូនស្រីរបស់លោក ដើម្បីកុំឱ្យនាងអស់សង្ឃឹមក្នុងជីវិត។ លោកបន្តថា «ខ្ញុំមានបងប្អូន៦នាក់ (ស្រី៣) ។ ហើយខ្ញុំជាកូនទី២ ឯស្រីពៅ ជាកូនពៅគេ ។ រឿងដែលក្រុមគ្រួសារខ្ញុំ បានលាក់ពីជំងឺស្រីពៅកាលកន្លងមកនោះ គឺគ្មានបំណងណាផ្សេងទេ ប៉ុន្តែដើម្បីលើកទឹកចិត្តដល់ស្រីពៅប៉ុណ្ណោះ ។
ក្រុមគ្រួសារមិនចង់និយាយថា គាត់ឈឺធ្ងន់អីចឹងទេ ដើម្បីកុំឱ្យម្ចាស់ខ្លួននាងអស់សង្ឃឹម ព្រោះតែការចំណាយថវិកាព្យាបាលអស់ច្រើន ដោយបានបញ្ជូនទៅព្យាបាលនៅពេទ្យថៃជាង៣ឆ្នាំ ។ ហើយចុងក្រោយ គឺនៅឥណ្ឌានេះ មានរយៈពេលជាង៣ខែមកហើយ ។
លោក ប៊ុន ថន ក៏បានលើកឡើងបន្តថា តាមពិត ប្អូនខ្ញុំមានជំងឺសួតនិងក្រលៀន ហើឮថា ពេទ្យនៅឥណ្ឌាពូកែព្យាបាលខាងជំងឺហ្នឹង ទើបក្រុមគ្រួសារសម្រេចចិត្តបញ្ជូនទៅព្យាបាលនៅឥណ្ឌា ។
បញ្ជាក់ផងដែរថា កញ្ញាខេមរៈ ស្រីពៅ បានទទួលមរណភាពនៅមន្ទីរពេទ្យឥណ្ឌា កាលពីថ្ងៃទី២៥មករា ឆ្នាំ២០១៩ ដែលបានធ្វើឱ្យគ្រប់គ្នា ពិសេសគឺអ្នកគាំទ្រនាង មានការភ្ញាក់ផ្អើល និងអាឡោះអាល័យខ្លាំងណាស់ ៕
