ភ្នំពេញ៖ មកទល់នឹងពេលនេះ ថ្លៃចំណាយថ្លៃព្យាបាលរបស់នាយ សាន ម៉ៅ កាន់តែចំណាយច្រើនៗទៅ ដែលជាហេតុបង្កផលលំបាក ដល់ក្រុមគ្រួសារ ត្រូវយកឡាន និងប្លង់ដីផ្ទះ ទៅបញ្ចាំដើម្បីបានថវិកាព្យាបាល ។
គិតត្រឹមរយៈពេល ២១ ថ្ងៃមកនេះ ថ្លៃចំណាយថ្លៃព្យាបាលនាយសាន ម៉ៅ បូករួមនឹងសេវាកម្មផ្សេងៗ បានចំណាយដល់ទៅ ១៣២០០ ដុល្លារអាម៉េរិក ដោយក្នុងនោះ ចំណែក ១ម៉ឺនដុល្លារ បានចាយក្នុងមន្ទីរពេទ្យសង្គ្រោះក្នុងប្រទេសកម្ពុជា និង ចំណែក ៣២០០ ដុល្លារទៀត គឺថ្លៃដឹក នាយសានម៉ៅ ទៅកាន់ប្រទេសថៃ ។
បើតាមផេកអ្នកនាងចន ចាន់លក្ខិណា ប្រធានសមាគមសិល្បៈ បានសរសេរកាលពីម្សិលមិញថា «ពេលនេះលោកពូ សាន ម៉ៅ កំពុងសម្រាកព្យាបាលនៅមន្ទីរមួយដែលស្ថិតនៅខេត្តស៊ីសាកេត ប្រទេសថៃ កំឡុងពេលលោកពូព្យាបាលនៅមន្ទីរពេទ្យក្នុងប្រទេសខ្មែរក្នុងបន្ទប់សង្គ្រោះបន្ទាន់រយះពេល21ថ្ងៃគាត់ចំណាយអស់ជិត 10000$ » ។
ប្រធានសមាគមដដែលបានបន្តថា «គ្រួសាររបស់លោកពូបានយកផ្ទះ និង ឡាន ទៅបញ្ចាំបានថវិការចំនួន 15000$ ដើម្បីយកលោកពូទៅព្យាបាលនៅមន្ទីរពេទ្យក្នុងប្រទេសថៃ ហើយមកដល់ពេលនេះគឺគាត់បានចំណាយលើថ្លៃរថយន្តសង្គ្រោះពីភ្នំពេញដល់ព្រំដែនខ្មែរថៃអស់ 3000$ ហើយថ្លៃរថយន្តសង្គ្រោះពីព្រំដែនខ្មែរថៃទៅខេត្តស៊ីសាកេតប្រទេសថៃគឺចំណាយអស់ជាង 7000បាត នេះគ្រាន់តែថ្លៃរថយន្តដឹកអ្នកជំងឺទេ ថ្លៃព្យាបាលគឺមិនទាន់ដឹងនៅឡើយទេ ។ពេលនេះស្ថានភាពរបស់លោកបានធូបន្តិចហើយ ។ ខ្ញុំសូមជូនពរអោយលោកពូឆាប់ជាពីជំងឺទាំងឡាយ »
