ភ្នំពេញ៖ យុវជន យាង វណ្ឌី ប្រធានក្រុមព្រះសុរិយា ដែលគេស្គាល់ថាជាយុវជនមួយរូបធ្វើការពាក់ព័ន្ធនឹងវិស័យសិល្បៈ នៅព្រឹកថ្ងៃទី២៧ ខែធ្នូ ឆ្នាំ២០១៨ បានបញ្ចេញមតិយោបល់សុំធ្វើការវែកញែកទៅលើសម្តីលោក ថៃ នរៈសត្យា នឹងសុំផ្តាំទៅដល់ទស្សនិកជនមួយចំនួន ត្រូវធ្វើការសិក្សា ស្វែងយល់ឲ្យយល់ដល់គិត មុននឹងបញ្ចេញទស្សនៈណាមួយ។
យាង វណ្ឌី បានផ្តល់បទសម្ភាសន៍ជាមួយ OBN Asia នាព្រឹកមិញ ដោយធ្វើការវែកញែកថា ទស្សនៈបុគ្គលរបស់ខ្ញុំ ដោយខ្ញុំបានស្តាប់ទៅលើប្រសាសន៍លោកពូ ថៃ នរៈសត្យា ហើយ ដោយគោលគំនិតគាត់ចង់ថារឿងនេះតូច ដោយសារតែភាគីខាងបង្កជម្លោះនោះ មិនបានចេញមុខសុំទោស ដែលធ្វើឲ្យជនរងគ្រោះដូចកញ្ញា ទេព បូព្រឹក្ស គាត់មិនសុខចិត្ត ហើយរឿងហ្នឹងគឺគាត់ចង់បានន័យថាអ៊ីចឹង ។ បើសិនជា ភាគីបង្កជម្លោះព្រមទទួលកំហុស វាចប់តាំងពីយប់ថ្ងៃកើតហេតុមកម្លេះ។
យុវជនរូបនេះបានបន្តថា បើតាមប្រសាសន៍លោកពូ ថៃ នរៈសត្យា ក៏បានពន្យល់ដែរថាដោយសារតែមនុស្សខ្លះនាពេលបច្ចុប្បន្ន បានធ្វើឲ្យតម្លៃសីលធម៌ខ្លួនធ្លាក់ចុះ ក៏ព្រោះតែទឹកលុយ មានអំណាច មានខ្នងមានខ្សែអ៊ីចឹងទៅ ដោយគ្រាន់តែសិល្បៈករមួយរូប គាត់មិនចង់សុំទោស ក៏បាន។ នេះជាការយល់ឃើញរបស់ខ្ញុំ ទៅលើសម្តីលោក ពូ ថៃ នរៈសត្យា ដោយលោកចង់មានន័យថាអ៊ីចឹង។ ម្យ៉ាងទៀត បើសិនជាជនងបង្កចេញមុខសុំទោស នោះរឿងវាមិនដល់ថ្ងៃហ្នឹងនោះទេ ចប់សព្វគ្រប់បាត់ទៅហើយ។
យាង វណ្ឌី ថា«ក្នុងប្រសាសន៍លោកពូ ឯកឧត្តមថៃ នរៈសត្យា គាត់ចង់ផ្តល់ដំបូន្មានច្រើនឲ្យយើងទាំងអស់គ្នាធ្វើអ្វីក៏ដោយត្រូវគិត រឿងខ្លះវាមិនធំនោះទេ បើសិនជាយើងធ្វើខុសហើយចេះទទួលស្គាល់កំហុសខ្លួនឯងវាល្អសម្រាប់យើងទាំងសងខាង បើសិនជាយើងធ្វើខុសហើយ មិនទទួលកំហុស ថ្ងៃក្រោយទៅយើងនឹងមានវិប្បដិសារី» ។ វណ្ឌី បានបន្តថា អ្វីដែលឯកឧត្តមថៃ នរៈសត្យា និយាយគឺលោកចង់សម្តីទៅលើ ករណី ដែលបានកើតភ្លាមៗនោះជារឿងតូច ហើយទេព បូព្រឹក្ស ខ្លួនឯងក៏បានលើកឡើងថា បើសិនចេញមុខសុំទោសគាត់ ចប់បាត់ហើយ តែអ្នកបង្កហេតុ គាត់រឹង គាត់អាងថាជាកូនអ្នកមាន ជាកូនម្ចាស់ហាង ដែលធ្វើឲ្យរឿងនេះកាន់តែធំឡើង។
ប្រធានក្រុមព្រះសុរិយា ខាងលើបានបន្តទៀតថា រឿងនេះបណ្តឹងបានឈានចូលដល់ប៉ុស្តិ៍ប៉ូលិសបឹងកក់ទី១ រួចហើយ ហើយសម្រាប់អ្នកសរសេរ ឬបញ្ចេញយោបល់អ្វីមួយគួរគិតឲ្យគ្រប់ជ្រុងជ្រោយ មុននឹងសម្រេចចិត្តសរសេរ សម្រាប់យើងដែលមិនដឹងរឿងពិតយើងកុំព្យាយាមបំផុស ត្រូវព្យាយាមស្តាប់ឲ្យច្បាស់ថាតើអ្នកដែលនិយាយនោះគាត់ចង់និយាយពីអ្វី ត្រូវស្តាប់ហើយយកមកគិត ថាគាត់និយាយហ្នឹងត្រូវអត់ គាត់និយាយហ្នឹង បន្ថោកទៅលើជនរងគ្រោះឬយ៉ាងណា ?
យុវជនខាងលើបានបន្ថែមថា រឿងនេះយើងមិនដឹងច្បាស់ក្រៅពីសាមីខ្លួននោះទេ ហើយយើងមិនបានដឹងពីស្ថានភាពទឹកក្តៅ ទឹកត្រជាក់ក្នុងគ្រួសារគេនោះទេ គេថាចង្កៀងផ្ទះនរណាបំភ្លឺផ្ទះអ្នកនោះ ។ ក្នុងនាមជាទស្សនិកជនគួររក្សាភាពស្ងៀមស្ងាត់បន្តិច ដើម្បីឲ្យសមត្ថកិច្ច ដោះស្រាយទៅលើរឿងដែលបានកើតឡើង ដោយរងចាំចម្លើយផ្លូវការពីក្រុមសមត្ថកិច្ចជំនាញកំពុងដោះស្រាយ ។ អ្វីដែលយើងគួរគិតនៅពេលនេះគឺ យើងគួរតែអំណរសាទរសម្រាប់ឆ្នាំថ្មី ឆ្លងឆ្នាំខាងមុខ ជាមួយអ្វីៗដែលកម្ពុជាកំពុងមាន ជាពិសេសកម្មវិធី វិមានឈ្នះៗខាងមុខ ៕
