ភ្នំពេញ៖ តារាចម្រៀងមៃ សុគន្ធ បានថ្លែងប្រាប់ OBN Asia នៅរសៀលថ្ងៃទី២៦ ខែធ្នូ ឆ្នាំ២០១៨ ឲ្យដឹងថា សម័យនេះជាសម័យសន្តិភាពហើយ គួរតែចាប់ជនបង្កលើតារាចម្រៀងទេព បូព្រឹក្ស ឲ្យបានដើម្បីចាត់ការទៅតាមផ្លូវច្បាប់ ហើយលោកក៏សូមអំពាវនាវដល់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជួយអន្តរាគមន៍លើរឿងនេះផង។
មៃ សុគន្ធ បានសរសេរនៅលើគណនីហ្វេសប៊ុករបស់លោក ថា «សូមសម្តេចកិត្តិព្រឹទ្ធបណ្ឌិត ជួយអន្តរាគមន៍រឿងមួយនេះផង ?❤️❤️ ក្នុងនាមយើងខ្ញុំជាអ្នកសិល្បៈ ពិតជាមានការឈឺចាប់ណាស់ នូវទង្វើបំពានគ្មានសីលធម៌របស់បុគ្គលពាល ដែលមិនអោយតំលៃលើនារី??? (បិទហាងនោះជាបន្ទាន់និងចាប់បុគ្គលនោះមកផ្តន្ទាទោស)ឯណាទៅតំលៃសិល្បៈខ្មែរនិងស្រ្តីខ្មែរ!!??? ។»
ក្នុងបទសម្ភាសន៍តាមទូរស័ព្ទជាមួយ OBN Asia តារាចម្រៀងខាងលើបានលើកឡើងថា «ខ្ញុំគិតថាទង្វើគប់ប៊ីយែរនេះជាទង្វើថោកទាប សម័យនេះខ្ញុំមិនធ្លាប់ឃើញ ហើយក៏ជារឿងទីមួយ ដែលខ្ញុំបានឃើញ យប់មិញខ្ញុំបានមើលមួយយប់ហើយ មើលទៅគួរឲ្យខ្លាច វាជាគំរូមិនល្អ បើមិនចាត់វិធានការក្តៅនោះទេ វានឹងមានបន្តទៀត ហើយអ្នកសិល្បករនឹងភ័យខ្លាច បុគ្គលនោះមិនឲ្យតម្លៃលើអ្នកសិល្បៈ ជាពិសេសសម្តីម្ចាស់ហាង និយាយចេញមកក្អឿតែម្តង» ។
លោកបានបន្តថា លោកបានតាមដានការឡាយនោះតាំងពីដើមរហូតចប់ ឃើញថាម្ចាស់ហាងគ្មានការទទួលខុសត្រូវ សម័យនេះ សន្តិភាពហើយ សង្គមហ្វេសប៊ុកប៉ុណ្ណឹងហើយ នៅមានរឿងអ៊ីចឹងទៀត ហើយរឿងនេះសូមសមត្ថកិច្ចត្រូវចាប់ឲ្យបានមកផ្តន្ទាទោស ដើម្បីជៀសឆ្ងាយពីគំរូអាក្រក់ បន្តទៅទៀត ។ លោកសង្កត់ធ្ងន់ថា បើសិនជារឿងនេះនៅបន្ត អ្នកសិល្បករ ច្រៀងតាមហាង និងភោជនីយដ្ឋានផ្សេងៗ គ្នានឹងភ័យខ្លាច ទាល់តែចាប់អ្នកប្រព្រឹត្តិដាក់គុក ហើយព្រមាន ១០០ឲ្យទាល់តែបាន ៕
សូមស្តាប់បទសម្ភាសន៍ទាំងស្រុង ជាមួយ មៃ សុគន្ធ ៖
https://www.youtube.com/watch?v=o3OOjmvYUS4&feature=youtu.be
