ភ្នំពេញ៖ ករណីរំជើបរំជួល គប់កំប៉ុងស្រាបៀរទៅលើទេព បូព្រឹក្ស កំពុងក្លាយជាបញ្ហាធំ សម្រាប់អ្នកសិល្បករគ្រប់រូបដោយម្នាក់ៗ ចង់ឲ្យចាត់ចែង ទៅតាមផ្លូវច្បាប់ ហើយក្នុងនោះអ៊ឹម ជីវ៉ា បានស្នើសុំ លោក ស ថេត ស្នងការរាជធានីភ្នំពេញ ចាត់ការទៅលើអ្នកប្រព្រឹត្តិ ។
អ៊ឹម ជីវ៉ា បានសរសេរនៅលើបណ្តាញសង្គមហ្វេសប៊ុករបស់លោក ថា «ខ្ញុំបាទ អ៊ឹម ជីវ៉ា សូមគោរព ឯកឧត្តម ឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញ មេត្តាជួយចាត់វិធានការចាប់ជនល្មើសនិងបក្សពួក ដែលប្រព្រឹត្តបទល្មើសជាក់ស្តែងដោយចេតនាចំពោះតារាចំរៀង កញ្ញា ទេព បូព្រឹក កាលពីវេលាយប់មិញផង ដោយកន្លែងកើតហេតុ នៅហាង សមុទ្រ ទីតាំងផ្ទះលេខ ៧២ ផ្លូវលេខ ១១៨ ស្កាត់ទឹកល្អក់១ ខណ្ឌទួលគោក រាជធានីភ្នំពេញ ។
លោកបានបន្តថា នេះត្រឹមតែស្រាបៀនិងកំប៉ុងគប់និងជះលើ ចុះបើក្នុងកំប៉ុងនោះជាទឹកអាស៊ីត និងជាអ្វីផ្សេងវិញ តើតារាចំរៀងម្នាក់នេះទទួលគ្រោះថ្នាក់យ៉ាងណា??? បើសិនជាបុគ្គលនោះមិនពេញចិត្តតារាចំរៀង ទេព បូព្រឹក្ស គាត់មិនត្រូវប្រព្រឹត្តទង្វើបែបនេះឡើយ តែទង្វើដ៏សែនថោកទាបនិងការមើលងាយ មកលើជនរងគ្រោះជាតារាចំរៀងម្នាក់នេះ គឺជាចេតនាគិតទុកជាមុនចំពោះជនល្មើស ដែលអាចចាត់ទុកថាជាការករណីប៉ុនប៉ងធ្វើមនុស្សឃាតដោយចេតនាគិតទុកជាមុន ។
អាស្រ័យដូចបានជំរាបជូនឯកឧត្តមខាងលើ សូមឯកឧត្តមនិងសហការីមេត្តាជួយចាត់វិធានការជាបន្ទាន់កុំអោយជនល្មើសរួចខ្លួនអោយសោះ និងដាក់ទោសទៅតាមច្បាប់ ដើម្បីកុំអោយប្រជាជនខ្មែរមួយចំនួនទៀតគាត់យកតម្រាប់គំរូតាម ៕
