ភ្នំពេញ៖ ប្រជាពលរដ្ឋជាង ១០០គ្រួសារ នៅក្នុងភូមិក្ដុរលើ ឃុំទ្រា ស្រុកក្រូចឆ្មារខេត្តត្បូងឃ្មុំកំពុងប្រកបរបរពុះឬស្សីធ្វើរនាបលក់ទទួលបានជីភាពធូរធារល្អប្រសើរ ។នេះបើយោងតាមប្រធានមន្ទីរព័ត៌មានខេត្តត្បូងឃ្មុំធ្វើសេចក្ដីរាយការណ៍ជូនលោក ខៀវ កាញារីទ្ធ រដ្ឋមន្រ្តីក្រសួងព័ត៌មាន។
លោក អុល អឿន ជាប្រជាពលរដ្ឋរស់នៅក្នុងភូមិឃុំខាងលើបានឲ្យដឹងថា លោកប្រកបរបរពុះឬស្សី ធ្វើរនាបលក់នេះរយៈពេល ៧ ឆ្នាំមកហើយៗ វាជួយឱ្យមានជីវភាពរបស់គាត់សមរម្យមានលុយកាក់សម្រាប់ចាយវាយដោះស្រាយក្នុងគ្រួសារស្រួលគួរសមដែរ ។
លោក អុល អឿន បន្តទៀតថា គាត់ដើរទិញឬស្សីពីប្រជាពលរដ្ឋនៅជិតៗភូមិ និងភូមិផ្សេងៗ ជួនកាលទៅទិញដល់ខេត្តក្រចេះថែមទៀតផងដែរ ។ ក្នុងឬស្សី ១ដើម តម្លៃ ៤.០០០ ៛ យកមកពុះក្នុងឬស្សី ១ដើម ពុះបានចាប់ពី ៦ ទៅ ៨សន្លឹក ដោយជួលគេពុះ ១០០សន្លឹក តម្លៃ២០.០០០ ៛ (២ម៉ឺនរៀល) ពុះរួចយើងយកទៅត្រាំទឹករយៈពេលពី១សប្តាហ៍ ទៅកន្លះខែ ទើបយើងហាលដាក់លក់ ធ្វើដូចនេះគឺការពារកុំឱ្យមេស៊ី ប្រើប្រាស់បានយូរឆ្នាំ គុណភាពរនាបល្អជាងគេគឺ លេខ១-រនាបឬស្សីស្រុកចិន លេខ២- គឺឬស្សីព្រៃ និបងលេខ៣-គឺឬស្សីស្រុក ។
លោក អឿន បន្ថែមទៀតថា ចំពោះទីផ្សាររនាប មានបងប្អូនក្នុងស្រុក និងក្រៅស្រុកមកកម្មង់ទិញយកទៅប្រើប្រាស់ជាលក្ខណៈគ្រួសារ និងមានឈ្មួញកណ្ដាលមកទទួលទិញដល់ផ្ទះតែម្ដងយកទៅលក់ចែកចាយបន្ត ក្នុងរនាប ១បាច់មានចំនួន ៥០សន្លឹក ប្រវែង ៩ ម៉ែត្រ តម្លៃ ៧ ម៉ឺនរៀល តាមវែងតាមខ្លី ទីផ្សាររនាបល្អមិនចុះឡើង ដូចទីផ្សារពោត និងដំឡូងទេ បើប្រៀបធៀបឆ្នាំទៅ និងឆ្នាំនេះ តម្លៃនៅតែថេរដដែល ។
លោក សេះ ហ៊ីម ជាមេឃុំទ្រា បានអោយដឹងថា នៅក្នុងភូមិក្ដុរលើនេះមានប្រជាពលរដ្ឋចំនួន ១៧៨ គ្រួសារ ហើយអ្នកប្រកបរបរពុះឬស្សីលក់នោះ គឺមានរហូតដល់៩០ភាគរយឯណោះ ហើយសុទ្ធតែមានជីវភាពសមរម្យល្អ ជាងនេះទៀតភូមិនេះ ក៏គ្មានអ្នកធ្វើចំណាកស្រុកទៅធ្វើការងារនៅក្រៅប្រទេសនោះទេ ៕
