ជាមួយប្រធានបទឡាយរបស់លោក ប៊ុន រតនា ធ្លាប់ជាអ្នកដឹកនាំសម្តែង និងជានាយកគ្រប់គ្រងផលិតកម្មវិធីស្ថានីយ៍ទូរទស្សន៍ថោន និងបច្ចុប្បន្នជាម្ចាស់ឃ្លាំងលក់រថយន្តពីរកន្លែងរបស់ S Auto ដោយដាក់ចំណងជើងនៃប្រធានបទឡាយថា« ហេតុអ្វីខ្មែរភាគច្រើនអោយតំលៃតារាបរទេស ជាងខ្មែរគ្នាឯង?»
ប្រធានបទ Live ខាងលើបានធ្វើឲ្យមានការគាំទ្រជុំវិញសិល្បករ និងអ្នកផលិតជាច្រើន ក្រោយលោកលើកហេតុផលចំ ចំណុចជាច្រើនពាក់ព័ន្ធស្ថានភាពបច្ចុប្បរបស់សិល្បៈ និងសិល្បករខ្មែរ ។
លោក ប៊ុន រតនា បាននិយាយក្នុងវិដេអូឃ្លិបរបស់លោកថា អ្នកគាំទ្រយើងបានឲ្យតម្លៃទៅលើតារាបរទេស ជាពិសេសតារាថៃ ដោយទៅទទួលដល់ ព្រលានយន្តហោះ បើសិនជាតារាខ្មែរយើងវិញ បើជួបគ្នានៅផ្សារថ្មីអី ងាប់ហើយនៅក្រៅចឹង! ឬជួបគ្នានៅកន្លែងញ៉ាំអី តែមុខគ្នាមិនមើលផង ។
លោកបានលើកឡើងថា មុនយើងបន្ទោសទៅលើអ្នកទស្សនាយើងត្រូវក្រឡេកមើល ទៅលើខ្លួនយើង មូលហេតុអ្វីបានជាគេមិនមើលរឿងយើង ? មូលហេតុអ្វីបានគេមិនគាំទ្រយើង ? រហូតមានតារាខ្លះគាត់ជួលអ្នកគាំទ្រ ធ្វើម៉េចក៏ដោយពេលខ្ញុំឡើងឆាក បងឯងត្រូវធ្វើឲ្យដូចស្រលាញ់ខ្ញុំណាស់ ចឹង ទិញតុក្កតា ហុចផ្កាឲ្យចឹងទៅ ដោយលុយទិញរបស់ទាំងនោះជារបស់តារាផ្ទាល់ខ្លួន ព្រោះតែចង់បានប្រជាប្រិយភាព ។
មូលហេតុអ្វីបានជាគេផលិតរឿង យកបេះដូងអ្នកមើលបាន ? លោកថា កត្តាមានច្រើនទី១ គឺ កត្តាធនធានមនុស្ស ជាកត្តាសំខាន់បំផុត បើអ្នកនិពន្ធ គឺគេមានជំនាញនិពន្ធ គេមានជំនាញសរសេរពាក្យពេចន៍ អត្ថបទ ហើយគេសិក្សាទៅលើចរិកលក្ខណៈរបស់អ្នកមើល សម័យនេះគេមើលអី ? បើសិនគេចូលចិត្តមើលរឿងឆ្លងភព យើងមិនអាចទៅមើលរឿងអវកាសម្នាក់ឯងនោះទេ ។
ទី២ កត្តាលុយកាក់ នៅប្រទេសយើងរឿងដែលល្អបំផុត ១ភាគអាចពី ៥០០០ពានដុល្លារ ទៅ ៧ពាន់ដុល្លារ ចំណែករឿងដែលបងប្អូនឃើញថាឆ្គង លេងមួយៗ ដូចរាប់ស្មៅហ្នឹង តម្លៃ១ភាគពី ២៥០០ ទៅ ៣៥០០ ដុល្លារ ។
លោកបានលើកខាងរឿងភាគថៃថា ១ភាគរបស់ថៃ តាមដែលលោក ដឹង ១ភាគមិនក្រោម ដប់ម៉ឺនដុល្លារនោះទេ កត្តាថវិការនេះ ជាកត្តាសំខាន់បំផុត ចឹងខុសគ្នាច្រើនណាស់ រវាងការផលិតនៅថៃ និងខ្មែរ ។
មួយវិញទៀត បើសិនផលិតករខ្មែរផលិតយើង ផលិតរឿងវៃគ្នាដូច អាចារភ្នំជីរ៉ាំ និងរឿងចិនហុងកុង ជាដើម ទាល់តែខ្មែរយើងធ្វើឲ្យល្អជាងគេ ដោយសារតែប្រជាពលរដ្ឋខ្មែរយើងស៊ាំភ្នែកហើយ គាត់មើលរឿងហុងកុង ផ្ទុះផូងផាំង ផ្ទុះដឹងផ្ទុះ វៃដឹងវៃ វៃមើលទៅស្តែងមែនទែន ។
ត្រង់ចំណុចនេះផលិតករងាកមកផលិតរឿងវៃវិញ សួរថាចំណេះដឹងផលិតករ កានតាណា ដល់ផលិតកម្មខាងហុងកុងដែរឬទេ ? យើងមិនទាន់ដល់គេទេ បទពិសោធន៍យើងនៅស្ទើរ ចំណេះដឹងយើងនៅមានកម្រិត បើសិនជាយើងធ្វើត្រឹមតែដល់ភាពយន្តបរទេស ក៏គាត់គ្មានអីចំលែកដែរ បើលើសបរទេសនឹងទទួលបានការសរសើរជាក់ជាមិនខាន ដោយអ្វីដែលពួកគាត់អាចនិយាយបានថា «ឥលូវនេះខ្មែរយើងគ្រាន់បើថតបានប៉ុណ្ណឹង តែបើឲ្យគាត់ដក់ចិត្តដិតអារម្មណ៍ ស្រលាញ់ណាស់មិនអាចទេ»។
ងាកមកវិញដើម្បីឲ្យសិល្បៈ និងភាពយន្តខ្មែរអាចទៅមុខបាន គឺអាស្រ័យលើកត្តាធនធានមនុស្ស រឿងល្អ ហើយតួសម្តែងបានល្អ សាកសមនឹងផ្ទៃរឿង ពេលខ្លះតួមិនល្បីតែគាត់សមនឹងរឿងក៏ធ្វើឲ្យរឿងនេះផ្ទុះបានដែរ មួយទៀតគឺកត្តាថវិកាក្នុងការផលិត ៕
ទស្សនាវីដេអូលើកឡើងរបស់លោក ប៊ុន រតនា ដូចខាងក្រោមនេះ៖
