John Cena គឺជាតារាម៉ូដែល កីឡាកាស និងជាអ្នកហាត់កាយវប្បកម្ម ដែលកំពុងល្បីល្បាញនៅលើពិភពលោក ជាពិសេសក្នុងប្រទេសចិននាពេលបច្ចុប្បន្ន។អ្នកកីឡាកាសអាយុ ៤១ ឆ្នាំ រូបនេះ បច្ចុប្បន្នកំពុងថតកុន នៅក្នុងប្រទេសយក្សក្នុងតំបន់អាស៊ី ជាមួយកំពូលតារាក្បាច់គុនចិន Jackie Chan ហៅឈិនឡុង ហើយលោកក៏បានថ្លែងប្រាប់ពីបទពិសោធន៍ថ្មី នៅក្នុងប្រទេសចិន ប្រាប់ WWE តាមរយៈ Youtube ។
តារាកីឡាកាសដ៏ល្បីល្បាញខាងលើ បានរស់នៅប្រទេសចិនអស់រយៈពេល ៣ខែទៅហើយ នឹងបន្តស្នាក់នៅរយៈពេលជាច្រើនខែទៀត ខណៈដែលការថតរឿងនៅតែបន្តនោះ។ថ្លែងប្រាប់គណនីយូធូបរបស់សម្ព័ន្ធកីឡាកាស WWE ថា ខ្ញុំបានមករស់នៅទីនេះរយៈពេល៣ខែទៅហើយ ដោយបានទៅកាន់ទីក្រុងជាច្រើនក្នុងប្រទេសនេះ ។ លោកបន្តថា រស់នៅទីនេះគឺមានសេចក្តីសុខ និងសប្បាយរីករាយ ហើយនឹងបន្តនៅពីរទៅបីឆ្នាំទៀត ហើយបើនិយាយពី ១ខែកន្លះដំបូងនៅក្នុងប្រទេសចិន មានអារម្មណ៍ថាសុខស្រួលណាស់។
John Cena ដែលជាម្ចាស់ពាន ១៦សម័យកាល បានរៀនភាសាចិនកុកងឺអស់រយៈពេលជាច្រើនឆ្នាំ ដោយបានស្វែងយល់និងកោតសរសើរចំពោះវប្បធម៌ចិន ។John Cena ក៏បានលើកឡើងថា លោកបានទៅកាន់ប្រទេសផ្សេងៗ រយៈពេល ២៥ដង ហើយនៅជុំវិញពិភពលោក ប៉ុន្តែគ្មានអ្វីគួរឲ្យចង់បាន តែនៅចិនលោកអាចនឹងបង្កើតលំនៅដ្ឋានមួយ នៅទីនេះ។John Cena នឹងបង្ហាញខ្លួននៅ WWE នាថ្ងៃទី៦ ខែតុលា ឆ្នាំ២០១៨ ក្នុងប្រទេសអូស្ត្រាលី ក្នុងព្រឹត្តិការណ៍ Super Show-Down ៕
