ភ្នំពេញ៖ កិច្ចប្រជុំគណៈកម្មការប្រតិបត្តិរបស់សមាគមសិល្បករខ្មែ ដឹកនាំដោយឯកឧត្ដម ទិត ថាវរិទ្ធ ប្រធានក្រុមប្រឹក្សាភិបាល នៅល្ងាចថ្ងៃចន្ទ ទី៣ ខែមិថុនា ឆ្នាំ២០២៤ បានប្រព្រឹត្តទៅដោយពិភាក្សាលើការងារសំខាន់ៗចំពោះមុខដែលត្រូវអនុវត្តបន្ត ដើម្បីធានាសម្រេចបានតាមផែនការយុទ្ធសាស្ត្ររបស់ខ្លួនស្របតាមការប្ដេជ្ញាចិត្តរបស់លោកជំទាវអ្នកឧកញ៉ាប្រធានសមាគម ជាពិសេសការចង្អុរបង្ហាញរបស់ថ្នាក់ដឹកនាំជាតិផងដែរ។
គណៈកម្មការប្រតិបត្តិបានពិភាក្សាលើការរៀបចំដំណើរការទូទៅនៃលេខាធិការដ្ឋាន និងការបែងចែកតួនាទីភារកិច្ច ព្រមទាំងការទទួលខុសត្រូវរបស់ក្រុមការងារ ក៏ដូចជាការកែសម្រួលប្រព័ន្ធរដ្ឋបាល ដើម្បីពន្លឿន និងពង្រឹងប្រសិទ្ធភាពការងារ។
ឯកឧត្ដមប្រធានអង្គប្រជុំបានលើកឡើងពីវឌ្ឍនភាពការងារថ្មីៗដែលសម្រេចបានបន្ទាប់ពីដំណើរការអាណត្តិថ្មីបានរយៈពេល១ខែមកនេះ ជាពិសេសភាពជោគជ័យនៃការរៀបចំកម្មវិធី”អ្នកស្នងមរតក” ដែលនាំមកនូវស្នាមញញឹម និងក្ដីសង្ឃឹមដល់ព្រឹទ្ធាចារ្យ សិល្បកររៀមច្បង និងសិល្បករ សិល្បការិនីទូទៅ ដែលបង្ហាញពីការរួមសាមគ្គីជាធ្លុងមួយក្នុងចង្កោមសិល្បករ។ ជាពិសេសការគាំទ្រ និងជ្រោមជ្រែងពីថ្នាក់ដឹកនាំជាតិ រួមទាំងសប្បុរសជនពីវិស័យឯកជនផងដែរ។
បើតាមឯកឧត្ដម ការងារចំពោះមុខរបស់សមាគមសិល្បករខ្មែរនាពេលនេះ គឺរៀបចំបង្កើតគណៈកម្មការ ដើម្បីចុះឈ្មោះសិល្បករគ្រប់ទម្រង់ ដែលមានបំណងចង់ចូលជាសមាជិករបស់សមាគម ដើម្បីអាចរួមគ្នាធ្វើការកិច្ចការលើកស្ទួយវិស័យសិល្បៈវប្បធម៌ជាតិ ហើយសមាគមក៏អាចជួយពួកគាត់វិញនៅពេលមានតម្រូវការណាមួយដោយឈរលើគោលការណ៍គោរពតាមច្បាប់រដ្ឋជាធរមាន និងលក្ខន្តិកៈរបស់សមាគមសិល្បករខ្មែរ។
ទោះបីយ៉ាងណា ឯកឧត្តមប្រធានអង្គប្រជុំបានស្នើដល់ថ្នាក់ដឹកនាំគ្រប់ផ្នែកទាំងអស់នៅតែបន្តការយកចិត្តទុកដាក់ពង្រឹងប្រសិទ្ធភាពការងារ ដើម្បីឆ្លើយតបតម្រូវការរបស់សមាជិកសមាគមផង និងដើម្បីអាចមានលទ្ធភាពអនុវត្តផែនការថ្មីៗបន្តបន្ទាប់ទៀត ព្រោះនៅមានកិច្ចការជាច្រើនដែលត្រូវធ្វើ នៅក្នុងដំណាក់កាលនៃការចាប់ផ្ដើមនេះ៕
ប្រភព៖ សមាគមសិល្បករខ្មែរ
