បរទេស៖ អគ្គនាយកអង្គការសុខភាពពិភពលោក (WHO) លោក Tedros Adhanom Ghebreyesus បាននិយាយកាលពីថ្ងៃពុធថា ការឆ្លងរាតត្បាតនៃជំងឺអុតស្វាដែលកំពុងរីករាលដាលយ៉ាងឆាប់រហ័សអាចត្រូវបានបញ្ឈប់ប្រសិនបើបណ្តាប្រទេស សហគមន៍ និងបុគ្គលនានាចាត់វិធានការសំខាន់ៗ និងចាត់វិធានការចាំបាច់នានាដើម្បីបញ្ឈប់ការឆ្លង និងការពារក្រុមដែលងាយរងគ្រោះ។
ក្នុងអំឡុងពេលនៃការថ្លែងចំណាប់អារម្មណ៍បើកនៅឯសន្និសីទសារព័ត៌មានមួយ លោក Tedros បាននិយាយថា ករណីជំងឺអុតស្វាជាង ១៨ ០០០ករណីត្រូវបានរាយការណ៍នៅទូទាំងពិភពលោក ដោយមានជាង ៧០ភាគរយមកពីអឺរ៉ុប និង ២៥ភាគរយមកពីអាមេរិក។ រហូតមកដល់ពេលនេះ មានអ្នកស្លាប់ដោយសារជំងឺអុតស្វាចំនួន ៥នាក់ហើយដែលត្រូវបានរាយការណ៍ ហើយប្រហែល ១០ភាគរយនៃករណីឆ្លងជំងឺនេះត្រូវបានបញ្ជូនទៅសម្រាកព្យាបាលនៅមន្ទីរពេទ្យសម្រាប់ការគ្រប់គ្រងការឈឺចាប់ដែលបណ្តាលមកពីជំងឺនេះ។
អង្គការសុខភាពពិភពលោកបានប្រកាសថា ជំងឺអុតស្វា គឺជាភាពអាសន្នផ្នែកសុខភាពសាធារណៈនៃក្តីបារម្ភអន្តរជាតិ (PHEIC) កាលពីថ្ងៃសៅរ៍សប្តាហ៍មុន។ PHEIC គឺជាកម្រិតនៃការប្រុងប្រយ័ត្នខ្ពស់បំផុតដែលស្ថាប័នសុខភាពអង្គការសហប្រជាជាតិអាចផ្តល់ឱ្យ។
អ្នកដឹកនាំបច្ចេកទេសរបស់អង្គការសុខភាពពិភពលោកសម្រាប់ជំងឺអុតស្វា លោកស្រី Rosamund Lewis បាននិយាយថា នៅពេលនេះ ការផ្ទុះឡើងគឺភាគច្រើននៅតែប្រមូលផ្តុំនៅក្នុងក្រុមបុរសដែលរួមភេទជាមួយបុរស ប៉ុន្តែនោះមិនមែនជាករណីនៅគ្រប់ទីកន្លែងនោះទេ។
យោងតាមអង្គការសុខភាពពិភពលោកបានឱ្យដឹងថា ជំងឺអុតស្វាអាចបណ្តាលឱ្យមានសញ្ញា និងរោគសញ្ញាជាច្រើន រួមទាំងដំបៅឈឺចាប់ផងដែរ។ មនុស្សមួយចំនួនមានរោគសញ្ញាធ្ងន់ធ្ងរដែលត្រូវការការថែទាំនៅក្នុងមណ្ឌលសុខភាព។ អ្នកដែលមានហានិភ័យខ្ពស់នៃការឆ្លងមេរោគនេះ រួមមានស្ត្រីមានផ្ទៃពោះ កុមារ និងអ្នកដែលគ្មានភាពស៊ាំនឹងមេរោគ។ មធ្យោបាយដ៏ល្អបំផុតដើម្បីជៀសវាងពីការឆ្លងជំងឺនេះ គឺកាត់បន្ថយហានិភ័យនៃការប៉ះពាល់គ្នាដោយផ្ទាល់។
អង្គការសុខភាពពិភពលោកកំពុងធ្វើការជាមួយបណ្តារដ្ឋជាសមាជិក និងសហភាពអឺរ៉ុប ទៅលើការចេញផ្សាយវ៉ាក់សាំង និងជាមួយបណ្តាដៃគូដើម្បីកំណត់យន្តការសម្របសម្រួលជាសកល។ វាក៏ណែនាំឱ្យមានការចាក់វ៉ាក់សាំងតាមគោលដៅសម្រាប់អ្នកដែលប៉ះពាល់ជាមួយអ្នកដែលមានជំងឺអុតស្វា និងសម្រាប់អ្នកដែលមានហានិភ័យខ្ពស់នៃការប៉ះពាល់ផងដែរ៕
ប្រភព៖ ក្រសួងព័ត៌មាន
