ក្រុមហ៊ុន ComfortDelGro របស់ប្រទេសសិង្ហបុរី បាននិយាយនៅថ្ងៃពុធនេះ (២០ ឧសភា) ថាខ្លួននឹងរៀបចំតម្លើង រនាំងប្លាស្ទិកចំនួន ៤០០ សម្រាប់រថយន្តតាក់ស៊ីក្នុងទីក្រុងសាំងហ្គាពួរ ដើម្បីជាការសាកល្បងមួយ ដែលមានគោលបំណងកាត់បន្ថយ ការរីករាលដាលនៃវីរុសកូវី១៩។
រនាំងប្រភេទថ្មីនេះ ត្រូវបានគេដាក់ឈ្មោះថា V-shield ដែលវាហ៊ុំព័ទ្ធកៅអីរបស់អ្នកបើកបរទាំងស្រុង ហើយវាត្រូបានផលិតឡើងដោយប្លាស្ទិកម្យ៉ាងដែលមានលក្ខណៈស្វិតវាយមិនបែក ព្រមទាំងមានលទ្ធភាព ការពារសុវត្ថិភាពអ្នកបើកបរ ពីអំពើហឹង្សាផ្សេងៗផងដែរ។
ការតម្លើងរនាំងការពារនេះ នឹងចាប់ផ្តើមតម្លើងលើរថយន្តតាក់ស៊ីចំនួន ៥០ជារៀងរាល់សប្តាហ៍ ហើយការតម្លើងនេះ នឹងបន្តពង្រីកលើរថយន្តតាក់ស៊ីផ្សេងទៀត ប្រសិនបើការសាកល្បងនេះទទួលបានជោគជ័យ៕
