ក្រសួងការពារជាតិ បូលីវី បាននិយាយកាលពីថ្ងៃសៅរ៍នេះថា យន្តហោះកងទ័ពអាកាសរបស់ខ្លួនមួយគ្រឿង បានធ្លាក់ក្នុងអំឡុងពេល បេសកកម្មមនុស្សធម៌មួយ ដោយបានសម្លាប់មនុស្សទាំងអស់ ៦នាក់នៅលើយន្តហោះនោះ។
សោកនាដកម្មនេះ បានកើតឡើងនៅជិតទីក្រុង Trinidad របស់ប្រទេសបូលីវី។ កងទ័ពជើងអាកាសបូលីវី បានសរសេរនៅលើបណ្តាញសង្គម Twitter ថាមាននាវិកជនជាតិបូលីវី ២នាក់ និង៤នាក់ទៀត ជាជនជាតិអេស្បាញ បានស្លាប់ក្នុងហេតុការណ៍ដ៏អាក្រក់មួយនេះ។
យន្តហោះដែលមានម៉ាស៊ីនភ្លោះមួយនេះ ធ្វើដំណើរទៅកាន់ទីក្រុង Santa Cruz ដែលជាកន្លែងផ្ទេរជើងហោះហើរ សម្រាប់ជនជាតិអេស្បាញទាំង៤នាក់នោះ ដើម្បីត្រលប់ទៅកាន់ស្រុកកំណើតរបស់ពួកគេ ហើយការស៊ើបអង្កេត កំពុងដំណើរការ ដើម្បីកំណត់ពីមូលហេតុ នៃឧប្បត្តិហេតុនេះ៕
