បរទេស៖ យោងតាមរបាយការណ៍របស់ប្រទេសរុស្ស៊ីបានឱ្យដឹងថា គម្រោងស្ពានផ្លូវហាយវេរួមគ្នាមួយតភ្ជាប់រវាងប្រទេសកូរ៉េខាងជើង និងរុស្ស៊ី ឆ្លងកាត់ទន្លេទូមេន កំពុងដំណើរការ ដោយគ្រោងនឹងបញ្ចប់នៅចុងឆ្នាំ២០២៦។
ទីភ្នាក់ងារព័ត៌មានរុស្ស៊ី Interfax បានរាយការណ៍ថា រដ្ឋាភិបាលរុស្ស៊ីបានប្រគល់ភារកិច្ចឱ្យក្រុមហ៊ុនសំណង់ TonnelYuzhStroi ជាអ្នកសាងសង់ និងរចនាស្ពានផ្លូវហាយវេឆ្លងកាត់ទន្លេនៅតាមព្រំដែនជាមួយប្រទេសកូរ៉េខាងជើង។
របាយការណ៍ក៏បានកត់សម្គាល់ផងដែរថា កាលបរិច្ឆេទផុតកំណត់សម្រាប់ការអនុវត្តកិច្ចសន្យារដ្ឋគឺថ្ងៃទី៣១ ខែធ្នូ ឆ្នាំ២០២៦។ កិច្ចសន្យានេះបានធ្វើឡើងបន្ទាប់ពីការចុះហត្ថលេខាលើកិច្ចព្រមព្រៀងនៅទីក្រុងព្យុងយ៉ាង កាលពីខែមិថុនាឆ្នាំមុនរវាងមេដឹកនាំកូរ៉េខាងជើង លោក គីម ជុងអ៊ុន (Kim Jong-un) និងប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ស្តីពីការសាងសង់ស្ពានឆ្លងកាត់ទន្លេទូមេន នៅខាងក្រៅកិច្ចព្រមព្រៀងសន្ធិសញ្ញាការពារទៅវិញទៅមកដ៏ទូលំទូលាយរបស់ពួកគេ។
ការសាងសង់ស្ពានផ្លូវហាយវេនេះត្រូវបានគេរំពឹងថានឹងសម្រួលដល់លំហូរទំនិញ និងអ្នកដំណើរកាន់តែលឿន និងសេរីរវាងប្រទេសទាំងពីរ ខណៈដែលភាគីទាំងពីរបានបង្កើនកិច្ចសហប្រតិបត្តិការទ្វេភាគីជាលំដាប់ក្នុងវិស័យសេដ្ឋកិច្ច យោធា និងវិស័យផ្សេងៗទៀត។
ស្ពាននេះត្រូវបានគេរាយការណ៍ថា មានរចនាសម្ព័ន្ធពីរគន្លងដែលមានប្រវែង ៨០០ម៉ែត្រ និងទទឹង ១០ម៉ែត្រ ហើយនឹងត្រូវសាងសង់នៅចម្ងាយប្រហែល ៤០០ម៉ែត្រពីក្រោមស្ពានរថភ្លើងមួយទៀតឆ្លងកាត់ទន្លេ៕
