វ៉ាក់សាំងការពារជំងឺមហារីករបស់រុស្ស៊ី នឹងត្រូវបានផ្តល់ជូនដោយមិនគិតថ្លៃ

បរទេស៖ ប្រទេសរុស្ស៊ីបានបង្កើតវ៉ាក់សាំង mRNA របស់ខ្លួនប្រឆាំងនឹងជំងឺមហារីក ដែលវានឹងត្រូវបានចែកចាយដល់អ្នកជំងឺដោយមិនគិតថ្លៃ។ នេះបើយោងតាមអគ្គនាយកមជ្ឈមណ្ឌលស្រាវជ្រាវវេជ្ជសាស្ត្រវិទ្យុសកម្មនៃក្រសួងសុខាភិបាលរុស្ស៊ី លោក អង់ដ្រេ កាព្រីន (Andrey Kaprin) បាននិយាយនៅវិទ្យុរ៉ូសស៊ីយ៉ា។

វ៉ាក់សាំងនេះត្រូវបានបង្កើតឡើងដោយសហការជាមួយមជ្ឈមណ្ឌលស្រាវជ្រាវជាច្រើន។ វាត្រូវបានគ្រោងនឹងដាក់ឱ្យប្រើប្រាស់ជាទូទៅនៅដើមឆ្នាំ២០២៥។

នៅពេលមុននេះ នាយកមជ្ឈមណ្ឌលស្រាវជ្រាវជាតិហ្គាម៉ាឡេយ៉ា (Gamaleya) សម្រាប់រោគរាតត្បាត និងអតិសុខុមជីវសាស្ត្រ លោក អាឡិចសាន់ដឺ ហ្គីនត៍ស្បឺក (Alexander Gintsburg) បានប្រាប់សារព័ត៌មានតាសស៍ (TASS) ថា ការធ្វើតេស្តសាកល្បងមុនគ្លីនិករបស់វ៉ាក់សាំងនេះបានបង្ហាញថា វាទប់ស្កាត់ការវិវត្តនៃដុំសាច់ និងការរីករាលដាលដែលមានសក្តានុពល៕