បរទេស៖ ប្រព័ន្ធផ្សព្វផ្សាយ Ukrayinska Pravda បានរាយការណ៍ថា ប្រធានាធិបតីអ៊ុយក្រែន លោក វូឡូឌីមៀ ហ្សេលេនស្គី (Volodymyr Zelensky) បានបញ្ជាក់ថា ប្រទេសនេះបានស្នើសុំមីស៊ីលតូម៉ាហាក (Tomahawk) រយៈចម្ងាយឆ្ងាយពីសហរដ្ឋ អាមេរិក។
លោក ហ្សេលេនស្គី បាននិយាយថា «នេះគឺជាព័ត៌មានសម្ងាត់រវាងអ៊ុយក្រែន និងសេតវិមាន» ដោយលោកបានអត្ថាធិប្បាយលើរបាយការណ៍ប្រព័ន្ធផ្សព្វផ្សាយថ្មីៗ ដែលស្នើឱ្យទីក្រុងគៀវបានសុំមីស៊ីល Tomahawk ។ លោកប្រធានាធិបតីបាននិយាយថា ប្រទេសអ៊ុយក្រែនបានស្នើសុំមីស៊ីលរយៈចម្ងាយឆ្ងាយដែលជាផ្នែកមួយនៃ «ផែនការជ័យជំនះ» របស់ខ្លួនដែលគ្រោងនឹងប្រើប្រាស់វា លុះត្រាតែប្រទេសរុស្ស៊ី «បន្តបង្កើន» ជម្លោះ។
លោក ហ្សេលេនស្គី បាននិយាយថា «វាជាឧបករណ៍សម្រាប់ការពារ» ។ កាលពីដើមសប្តាហ៍នេះ ប្រព័ន្ធផ្សព្វផ្សាយលោកខាងលិចបានរាយការណ៍ថា លោក ហ្សេលេនស្គី បានស្នើសុំមីស៊ីល Tomahawk ពីសហរដ្ឋអាមេរិក ដែលជាផ្នែកនៃ «កញ្ចប់រារាំងមិនមែននុយក្លេអ៊ែរ» នៅក្នុង «ផែនការជ័យជំនះ» របស់លោក។
មីស៊ីល Tomahawk មានរយៈចម្ងាយប្រហែល ២.៤០០គីឡូម៉ែត្រ។ នេះបើយោងទៅតាមរបាយការណ៍របស់ប្រព័ន្ធផ្សព្វផ្សាយក្នុងស្រុក៕
