បរទេស៖ ប្រទេសម៉ាឡេស៊ី និងថៃ បានចាប់ដៃគ្នាជំរុញវិស័យទេសចរណ៍ឆ្លងព្រំដែនតាមរយៈការចាប់ផ្តើមគំនិតផ្តួចផ្តើម «បើកបរដោយខ្លួនឯង» ក្នុងគោលបំណងលើកកម្ពស់ការយល់ដឹងអំពីផ្លូវទេសចរណ៍ និងសកម្មភាពនៅក្នុងប្រទេសទាំងពីរ។
លោកស្រី យ៉ាស្មីន យ៉ាស៊ីម (Yasmeen Yasim) អគ្គលេខាធិការរងនៃក្រសួងទេសចរណ៍ សិល្បៈ និងវប្បធម៌ របស់ប្រទេសម៉ាឡេស៊ី បាននិយាយថា គំនិតផ្តួចផ្តើមនេះមានគោលបំណងបង្កើនបទពិសោធន៍ទេសចរណ៍ ខណៈដែលជំរុញការផ្លាស់ប្តូរវប្បធម៌កាន់តែស៊ីជម្រៅរវាងប្រជាជាតិទាំងពីរ។
លោកស្រីបាននិយាយថា «ជាមួយនឹងកិច្ចសហការទាន់ពេលវេលាបែបនេះ យើងមានសុទិដ្ឋិនិយមក្នុងការសម្រេចបាននូវគោលដៅរបស់យើងនៃការមកដល់របស់ភ្ញៀវទេសចរចំនួន ២,៣លាននាក់ពីប្រទេសថៃក្នុងឆ្នាំ២០២៥។ វាឆ្លុះបញ្ចាំងពីការប្តេជ្ញាចិត្តរួមគ្នារបស់យើងក្នុងការពង្រឹងទំនាក់ទំនងក្នុងតំបន់តាមរយៈវិស័យទេសចរណ៍»។
លោកស្រីបានបញ្ជាក់បន្ថែមថា កិច្ចសហការនេះគាំទ្រដល់យុទ្ធនាការ «ទស្សនាម៉ាឡេស៊ីឆ្នាំ២០២៦» នាពេលខាងមុខ ដែលស្វែងរកការទាក់ទាញភ្ញៀវទេសចរឱ្យបានចំនួន ៣៥,៦លាននាក់។ ស្ថិតិបឋមបានបង្ហាញថា ចាប់ពីថ្ងៃទី០១ ខែមករា ដល់ថ្ងៃទី៣០ ខែកញ្ញា ប្រទេសថៃបានស្វាគមន៍ភ្ញៀវទេសចរម៉ាឡេស៊ីជាង ៣,៧លាននាក់ ដែលនៅក្នុងនោះ ៤៩,៣៣% បានចូលតាមរយៈប៉ុស្តិ៍ត្រួតពិនិត្យអន្តោប្រវេសន៍សាដៅ ក្នុងខេត្តសុងក្លា។
ទន្ទឹមនឹងនេះដែរ គិតត្រឹមខែសីហា ឆ្នាំ២០២៤ ប្រទេសម៉ាឡេស៊ីទទួលបានភ្ញៀវទេសចរចំនួន ១,១លាននាក់ពីប្រទេសថៃ ដែលកើនឡើង ១៩,៧% បើធៀបនឹងរយៈពេលដូចគ្នាកាលពីឆ្នាំមុន៕
