បរទេស៖ ក្រសួងហិរញ្ញវត្ថុបានប្រកាសកាលពីថ្ងៃពុធថា មូលនិធិដែលមានតម្លៃ ៦៤៩លានយ័ន (ប្រហែល ៩១លានដុល្លារអាម៉េរិក) ត្រូវបានបម្រុងទុកសម្រាប់គាំទ្រការឆ្លើយតបនឹងទឹកជំនន់ និងកិច្ចខិតខំប្រឹងប្រែងសង្គ្រោះគ្រោះមហន្តរាយនៅក្នុងតំបន់ជាច្រើនរបស់ប្រទេសចិន។
ក្រសួងបាននិយាយនៅក្នុងសេចក្តីថ្លែងការណ៍មួយថា មូលនិធិរបស់រដ្ឋាភិបាលកណ្តាលដែលត្រូវបានបែងចែកដោយគាំទ្រជាពិសេសចំពោះព្យុះទីហ្វុង និងការឆ្លើយតបទឹកជំនន់ ក៏ដូចជាការសង្គ្រោះគ្រោះមហន្តរាយនៅក្នុងខេត្តលាវនីង ខេត្តជីលីន ខេត្តហីឡុងជាំង ខេត្តអានហ៊ុយ ខេត្តហ្វូចៀន ខេត្តសានទុង ខេត្តហេណាន ខេត្តហ៊ូប៉ី ខេត្តហ៊ូណាន ខេត្តស៊ីឈួន ខេត្តសានស៊ី និងខេត្តកាន់ស៊ូ ព្រមទាំងនៅក្នុងតំបន់ស្វយ័តក្វាងស៊ី ជ័ង និងទីក្រុងឆុងឈីងផងដែរ។
សេចក្តីថ្លែងការណ៍បាននិយាយថា មូលនិធិនេះនឹងត្រូវបានប្រើប្រាស់ដើម្បីជួយដល់តំបន់ទាំងនេះក្នុងការធ្វើការងារដូចជាការជួសជុលគម្រោងទឹក និងសម្ភារៈបរិក្ខារដែលខូចខាត ក៏ដូចជាការស៊ើបអង្កេត និងលុបបំបាត់គ្រោះថ្នាក់ដើម្បីធានាបាននូវប្រតិបត្តិការប្រកបដោយសុវត្ថិភាពនៃគម្រោងទឹក និងសម្ភារៈបរិក្ខារនានាក្នុងរដូវទឹកជំនន់នេះ។
ក្រសួងគ្រប់គ្រងគ្រាអាសន្នបាននិយាយថា អាងទន្លេសំខាន់ៗចំនួន ៧ទីតាំងនៅក្នុងប្រទេសចិនកំពុងត្រៀមសម្រាប់រដូវទឹកជំនន់នៅក្នុងខែសីហានេះ ដែលជាពេលវេលាសម្រាប់គ្រោះទឹកជំនន់អាចកើតឡើងនៅក្នុងតំបន់ជាច្រើន ហើយកម្រិតទឹកអាចកើនឡើងលើសពីកម្រិតគ្រប់គ្រងនៅក្នុងទន្លេមួយចំនួន។
ក្រសួងក៏បានព្រមានផងដែរថា ខ្យល់ព្យុះទីហ្វុងពីរ ឬបីនឹងបោកបក់នៅខែនេះ ដែលប៉ះពាល់ដល់តំបន់ភាគខាងត្បូង និងភាគខាងកើតរបស់ប្រទេស៕
