បរទេស៖ ក្រោយហេតុការណ៍ធ្លាក់យន្តហោះយ៉ាងរន្ធត់នារសៀលនេះ ក្រុមអ្នកស៊ើបអង្កេតបានទាញយកឧបករណ៍ថតសំឡេង និងទិន្នន័យក្នុងប្រអប់ខ្មៅ ពីបំណែកយន្តហោះដែលបានធ្លាក់ខ្ទេចខ្ទីនោះបានហើយ បន្ទាប់ពីហោះនេះបានចាកចេញពីរដ្ឋធានីក្នុងប្រទេសនេប៉ាល់ ដោយហេតុការណ៍នេះបានសម្លាប់មនុស្ស១៨នាក់និងអ្នកបើកបរម្នាក់នៅរស់រានមានជីវិតប៉ុន្តែរងរបួសធ្ងន់។ មន្ត្រីប៉ូលីសឈ្មោះ Basanta Rajauri បាននិយាយថា ពេលនេះអាជ្ញាធរបានកំពុងទាញសពមនុស្សទាំង១៨ចេញដើម្បីកំណត់អត្តសញ្ញាណ។
យោងតាមសេចក្តីប្រកាសព័ត៌មានដែលចេញផ្សាយដោយអាជ្ញាធរអាកាសចរណ៍ស៊ីវិលនៃប្រទេសនេប៉ាល់ បាននិយាយថាយន្តហោះក្នុងស្រុក Saurya Airlines នេះគឺគ្រោងនឹងធ្វើដំណើរទៅកាន់ទីក្រុងរមណីយដ្ឋាន Pokhara ដោយវាបានហោះចេញពីអាកាសយានដ្ឋាន រដ្ឋធានី Kathmandu នៅវេលាម៉ោង 11:11 នាទីព្រឹក (ម៉ោងក្នុងស្រុក) ហើយវាបានបត់ទៅទិសខាងស្តាំ ប៉ុន្តែមួយសន្ទុះមកវាក៏បានធ្លាក់មួយមួយទំហឹងចុះក្រោម លាន់លឺសម្លេងផ្ទុះគួរឲ្យរន្ធត់ នាផ្នែកខាងកើតនៃអាកាសយានដ្ឋាន។ រដូវនេះជាភ្លៀងមូសុងនៅរដ្ឋធានី Kathmandu ប៉ុន្តែពេលដែលហោះហើរនោះគឺមិនមានភ្លៀងធ្លាក់ទេ។
ទោះជាយ៉ាងណាក៏ដោយនៅលើអាកាសគឺពិបាកប៉ាន់ស្មានខ្លាំងណាស់ អាចមើលក្នុងកម្រិតទាបពីទូទាំងរដ្ឋាធានីដែរ។ សូមបញ្ជាក់ថាអាកាសយានដ្ឋាន Kathmandu គឺជាអាកាសយានដ្ឋានសំខាន់មួយដែលបម្រើសេវាទេសចរណ៍ក្នុងប្រទេសនេប៉ាល់ជាយូរណាស់មកហើយ វាស្ថិតនៅខាងក្នុងជ្រលងភ្នំដែលហ៊ុមព័ទ្ធជុំវិញដោយភ្នំសងខាងភាគច្រើនដែរ។ វាត្រូវបានគេចាត់ទុកថាជាអាកាសយានដ្ឋានដែលមានសភាពលំបាកមួយសម្រាប់អ្នកបើកបរយន្តហោះ នៅពេលហោះឡើង និង បន្ទាបខ្លួនចុះហើយភាគច្រើនយន្តហោះធំៗត្រូវឆ្លងកាត់ជ្រលងភ្នំដើម្បីចុះចតនៅទីនេះ ដោយវានៅជាប់ទីក្រុង ហើយហ៊ុមព័ទ្ធដោយផ្ទះអ្នកស្រុក និងសង្កាត់មួយចំនួនទៀត។
សពមនុស្សទាំងអស់ត្រូវបានគេយកទៅទុកនៅទីភ្នាក់ងារ T.U. នៃមន្ទីរពេទ្យ Kathmandu សម្រាប់ការធ្វើកោសល្យវិច្ច័យបន្ត។ ក្រុមហ៊ុនអាកាសចរណ៍ស៊ីវិលបានបង្ហាញថាអ្នកបើកបរក្នុងតួរយន្តហោះនេះគឺមានពីរនាក់ និងអ្នកដំណើរ ១៧នាក់ដោយអ្នកដំណើរ ១៦នាក់ជាជនជាតិនេប៉ាល់ ហើយអ្នកដំណើរម្នាក់គឺជាជនជាតិយេម៉ែន៕
