លោក វ្ល៉ាឌីមៀ ពូទីន (Vladimir Putin) បាននិយាយថា ប្រទេសរុស្ស៊ីនឹងជម្នះរាល់ឧបសគ្គ និងសម្រេចបាននូវគោលដៅរបស់ខ្លួនក្នុងការអភិវឌ្ឍ។លោក ពូទីន ទទួលបានសំឡេងគាំទ្រ ៨៧.២៨% នៅក្នុងការបោះឆ្នោតប្រធានាធិបតីរុស្ស៊ីឆ្នាំ២០២៤ ដែលប្រព្រឹត្តទៅចាប់ពីថ្ងៃទី១៥ ដល់ថ្ងៃទី១៧ ខែមីនា។
យោងតាមវិមានក្រឹមឡាំងបានឱ្យដឹងថា លោកប្រធានាធិបតីបាននិយាយនៅក្នុងសុន្ទរកថារបស់លោកនៅឯពិធីសម្ពោធមួយថា «យើងត្រូវតែធានាបាននូវការបន្តដែលអាចទុកចិត្តបានក្នុងការអភិវឌ្ឍប្រទេសសម្រាប់ទសវត្សរ៍ខាងមុខ ដោយចិញ្ចឹម និងអប់រំយុវជនជំនាន់ក្រោយ ដែលនឹងពង្រឹងអំណាចរបស់រុស្ស៊ី និងអភិវឌ្ឍភាពជារដ្ឋរបស់យើង ដែលផ្អែកលើភាពសុខដុមរមនារវាងជាតិសាសន៍ និងលើការអភិរក្សប្រពៃណីរបស់ប្រជាជនទាំងអស់ដែលរស់នៅក្នុងប្រទេសរុស្ស៊ី»។
លោក ពូទីន បាននិយាយទៅកាន់ប្រជាជាតិថា «ខ្ញុំនឹងធ្វើអ្វីគ្រប់យ៉ាងដែលចាំបាច់ អ្វីគ្រប់យ៉ាងនៅក្នុងអំណាចរបស់ខ្ញុំ ដើម្បីបង្ហាញអំពីភាពត្រឹមត្រូវនៃការជឿទុកចិត្តរបស់ប្រជាជន»។ លោកពូទីនបាននិយាយថា «យើងគឺជាមនុស្សរួបរួម និងអស្ចារ្យ ហើយយើងរួមគ្នានឹងជម្នះរាល់ឧបសគ្គ ហើយបង្វែរផែនការទាំងអស់របស់យើងឱ្យក្លាយជាការពិត។ យើងរួមគ្នានឹងទទួលបានជ័យជំនះ»។
លោក ពូទីន ធ្លាប់ធ្វើជានាយករដ្ឋមន្ត្រីរុស្ស៊ីលើកដំបូងក្នុងឆ្នាំ១៩៩៩ ហើយបន្ទាប់មកក្លាយជាប្រធានាធិបតីស្តីទី។ លោកបានជាប់ឆ្នោតជាប្រធានាធិបតីនៃប្រទេសរុស្ស៊ីនៅថ្ងៃទី២៦ ខែមីនា ឆ្នាំ២០០០ ហើយបានជាប់ឆ្នោតម្តងទៀតសម្រាប់អាណត្តិទី២ នៅថ្ងៃទី១៤ ខែមីនា ឆ្នាំ២០០៤។ ពីឆ្នាំ២០០៨ ដល់ឆ្នាំ២០១២ លោកបានធ្វើជានាយករដ្ឋមន្ត្រី។ លោកទទួលបានជ័យជំនះដ៏លើសលប់នៅក្នុងការបោះឆ្នោតប្រធានាធិបតីឆ្នាំ២០១២ ហើយត្រូវបានជាប់ឆ្នោតឡើងវិញនៅឆ្នាំ២០១៨ សម្រាប់អាណត្តិ ៦ឆ្នាំទៀត៕
ប្រភព៖ AKP
