បរទេស៖ ប្រភពបាននិយាយកាលពីថ្ងៃចន្ទថា ប្រទេសឥណ្ឌូនេស៊ីបានស្នើសុំកាត់បន្ថយការបង់ប្រាក់របស់ខ្លួន សម្រាប់គម្រោងអភិវឌ្ឍន៍យន្តហោះចម្បាំងរួមគ្នាជាមួយប្រទេសកូរ៉េខាងត្បូងមកនៅត្រឹមប្រហែល១ភាគ៣ នៃចំនួនដើម ចំពេលមានការព្រួយបារម្ភលើការពន្យារពេលនៃការបង់ប្រាក់របស់ខ្លួន។
ពួកគេបាននិយាយថា ថ្មីៗនេះ ប្រទេសឥណ្ឌូនេស៊ីបានស្នើឱ្យចំណាយត្រឹមតែ ៦០០ប៊ីលានវ៉ុន (៤៤២.៣លានដុល្លារអាម៉េរិក) សរុបសម្រាប់គម្រោងយន្តហោះ KF-21 បន្ទាប់ពីដំបូងបានយល់ព្រមបង់ប្រាក់ប្រហែល ២០% នៃកម្មវិធី ៨.១ទ្រីលានវ៉ុន ដែលបានចាប់ផ្តើមក្នុងឆ្នាំ២០១៥ ដើម្បីសាងសង់យន្តហោះចម្បាំងទំនើបនៅឆ្នាំ២០២៦។
ដំបូងឡើយ ទីក្រុងចារកាតាបានយល់ព្រមបង់ប្រាក់ជាថ្នូរនឹងការទទួលបានគំរូ និងការផ្ទេរបច្ចេកវិទ្យា និងការផលិតយន្ដហោះចំនួន ៤៨គ្រឿងក្នុងប្រទេសឥណ្ឌូនេស៊ី ប៉ុន្តែត្រូវបានគេនិយាយថា បានស្នើឱ្យកាត់បន្ថយចំនួននៃការបង់ប្រាក់សម្រាប់ការផ្ទេរបច្ចេកវិទ្យាតិចជាងមុន។
រហូតមកដល់ពេលនេះ ប្រទេសឥណ្ឌូនេស៊ីបានរួមចំណែកប្រហែល ៣០០ប៊ីលានវ៉ុនដល់គម្រោងនេះ ហើយបានបរាជ័យក្នុងការបន្តកាលបរិច្ឆេទទូទាត់ប្រាក់ ដែលនាំឱ្យមានសំណួរជុំវិញការប្តេជ្ញាចិត្តរបស់ខ្លួន។
ប្រទេសឥណ្ឌូនេស៊ី ត្រូវបានគេដឹងថា បានស្នើសុំឱ្យប្រទេសកូរ៉េខាងត្បូងកាលពីចុងឆ្នាំមុន ដើម្បីពន្យាការបង់ប្រាក់របស់ខ្លួនសម្រាប់គម្រោងនេះដល់ឆ្នាំ២០៣៤ ប៉ុន្តែទីក្រុងសេអ៊ូលបានរក្សាជំហររបស់ខ្លួនថា រឿងនេះគួរតែធ្វើឡើងត្រឹមថ្ងៃផុតកំណត់នៃការអភិវឌ្ឍនៅឆ្នាំ២០២៦៕
ប្រភព៖ AKP
