បរទេស៖ ប្រភពពីប្រទេសអ៊ីស្រាអែលបាននិយាយថា គ្រាប់រ៉ុក្កែតប្រហែល ២០គ្រាប់ត្រូវបានបាញ់ចេញពីប្រទេសលីបង់នៅភាគខាងជើងប្រទេសអ៊ីស្រាអែល ដោយបានបំផ្លាញសម្ភារៈបរិក្ខារ និងបណ្តាលឱ្យដាច់ចរន្តអគ្គិសនីនៅក្នុងទីក្រុងគីរីយ៉ាត ស្មូណា។
យោធាបានបញ្ជាក់នៅក្នុងសេចក្តីថ្លែងការណ៍មួយថា គ្រាប់រ៉ុក្កែតជាច្រើនបានវាយប្រហារទីក្រុងនេះ ដោយបង្កឱ្យមានសម្លេងស៊ីរ៉ែនវាយប្រហារតាមអាកាស។ ប៉ូលិសបាននិយាយថា គ្រាប់រ៉ុក្កែតបានធ្លាក់នៅទីតាំងជាច្រើននៅទីក្រុងគីរីយ៉ាត ស្មូណា បណ្តាលឱ្យដាច់ចរន្តអគ្គិសនី និងខូចខាតទ្រព្យសម្បត្តិ។ មិនទាន់មានអ្នករងរបួសត្រូវបានគេរាយការណ៍នៅឡើយទេ។
ឧបទ្ទវហេតុនេះ គឺជាលើកចុងក្រោយបង្អស់នៅក្នុងការប្រយុទ្ធគ្នាឆ្លងព្រំដែនរវាងអ៊ីស្រាអែល និងក្រុមប្រដាប់អាវុធលីបង់ហេហ្សបូលឡាហ៍ ដែលបានចាប់ផ្តើមកាលពីថ្ងៃទី៨ ខែតុលា ឆ្នាំ២០២៣៕
ប្រភព៖ AKP
