បរទេស៖ រដ្ឋមន្ត្រីការបរទេសចិន លោក វ៉ាង យី (Wang Yi) បាននិយាយកាលពីថ្ងៃព្រហស្បតិ៍ថា ប្រទេសចិន និងឥណ្ឌូនេស៊ីអាចជាក្បាលម៉ាស៊ីននៃទំនើបកម្មសម្រាប់ប្រទេសកំពុងអភិវឌ្ឍន៍។
លោក វ៉ាង បានបន្ថែមថា ប្រទេសចិន និងឥណ្ឌូណេស៊ីអាចធ្វើជាគំរូនៃការជឿទុកចិត្តគ្នា និងជំនួយរវាងប្រទេសធំមួយ និងប្រទេសជិតខាង ហើយគួរតែនៅតែបើកចំហ និងរួមបញ្ចូលនៅក្នុងកិច្ចសហប្រតិបត្តិការឈ្នះឈ្នះរបស់ពួកគេ។
លោក វ៉ាង ដែលជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បានធ្វើការកត់សម្គាល់នៅក្នុងសន្និសីទសារព័ត៌មានរួមគ្នាមួយ បន្ទាប់ពីលោកបានជួបជាមួយរដ្ឋមន្ត្រីការបរទេសឥណ្ឌូនេស៊ី លោក រ៉េតណូ ម៉ារស៊ូឌី (Retno Marsudi) ។
លោក វ៉ាង បានអបអរសាទរប្រទេសឥណ្ឌូនេស៊ីចំពោះការបោះឆ្នោតសកលនាពេលថ្មីៗនេះ និងសមិទ្ធិផលនៃការអភិវឌ្ឍឆ្នើមដែលទទួលបានដោយប្រធានាធិបតី លោក ចូកូ វីដូដូ (Joko Widodo) ។
ភាគីទាំងពីរបានឯកភាពថា ប្រទេសចិន និងឥណ្ឌូណេស៊ីគួរតែធ្វើជាគំរូនៃការជឿទុកចិត្តគ្នា និងជំនួយរវាងប្រទេសធំៗ និងប្រទេសជិតខាង ជាក្បាលម៉ាស៊ីនសម្រាប់ទំនើបភាវូបនីយកម្មនៃប្រទេសកំពុងអភិវឌ្ឍន៍ និងជាដៃគូនៃការបើកចំហ បរិយាប័ន្ន និងកិច្ចសហប្រតិបត្តិការឈ្នះ-ឈ្នះ។
ភាគីទាំងពីរមានឆន្ទៈបន្តធ្វើការជាមួយប្រទេសអាស៊ានដទៃទៀត ដើម្បីអនុវត្តយ៉ាងពេញលេញ និងប្រកបដោយប្រសិទ្ធភាពនូវសេចក្តីប្រកាសស្តីពីការប្រតិបត្តិនៃភាគីនានានៅសមុទ្រចិនខាងត្បូង និងពន្លឿនការចរចានៃក្រមប្រតិបត្តិនៅសមុទ្រចិនខាងត្បូង ដើម្បីកសាងសមុទ្រចិនខាងត្បូងទៅជាសមុទ្រសន្តិភាព និងកិច្ចសហប្រតិបត្តិការ៕
ប្រភព៖ AKP
