បរទេស៖ ទូរទស្សន៍រដ្ឋអ៊ីរ៉ង់បានរាយការណ៍ថា កាលពីថ្ងៃអង្គារ ក្រុមសកម្មប្រយុទ្ធ Sunni បានវាយប្រហារលើរថយន្តនគរបាលចំនួន០២គ្រឿង នៅភាគអាគ្នេយ៍ប្រទេសអ៊ីរ៉ង់ ដោយបានសម្លាប់មន្ត្រីនគរបាលយ៉ាងហោចណាស់ ០៥នាក់ និងបានបង្កឲ្យរងរបួសម្នាក់។
ក្រុម Jaish al-Adl បានអះអាងថា ការវាយប្រហារនេះបានកើតឡើងនៅក្នុងខេត្ត Sistan-Baluchestan ប៉ុន្មានថ្ងៃបន្ទាប់ពីក្រុមនោះបានវាយលុកទីស្នាក់ការកណ្តាលរបស់ឆ្មាំបដិវត្តន៍ចំនួន០២ទីតាំងនៅក្នុងតំបន់តែមួយ និងបានសម្លាប់បុគ្គលិកសន្តិសុខចំនួន ១១នាក់។
ទីភ្នាក់ងារសារព័ត៌មាន Tasnim ពាក់កណ្តាលផ្លូវការបាននិយាយថា មន្ត្រីនគរបាលជាច្រើននាក់កំពុងធ្វើដំណើរត្រឡប់ពីការដឹកជញ្ជូនជនសង្ស័យម្នាក់ចំពោះការសម្លាប់មន្ត្រីនគរបាលម្នាក់ ដែលត្រូវបានបាញ់ប្រហារកាលពីខែមុន អំឡុងពេលបេសកកម្មបង្ក្រាបគ្រឿងញៀន។
ក្រុម Jaish al-Adl និយាយថា ខ្លួនស្វែងរកសិទ្ធិសេរីភាពឲ្យកាន់ច្រើន និងលក្ខខណ្ឌរស់នៅកាន់តែប្រសើរជាងមុនសម្រាប់ជនជាតិភាគតិច Baluchis នៅក្នុងប្រទេសអ៊ីរ៉ង់ ដែលគ្រប់គ្រងដោយក្រុមនិកាយ Shi’ite។ ក្រុម Jaish al-Adl បានអះអាងទទួលខុសត្រូវ ចំពោះការវាយប្រហារជាច្រើនលើកទៅលើកម្លាំងសន្តិសុខអ៊ីរ៉ង់នៅខេត្ត Sistan-Baluchestan ក្នុងរយៈពេលប៉ុន្មានឆ្នាំចុងក្រោយនេះ។
